Asina akordu Etapa II entre Organizasaun Sosiedade Sivil no GASC

𝐃𝐢𝐥𝐢 𝟐8 𝐦𝐚𝐢𝐮 𝟐𝟎𝟐𝟓 : kuarta feira semana ne’e organizasaun sosiedade sivíl hamutuk 21 asina akordu ho Gabinete Apoiu Sosiedade Sivíl (GASC sigla portugés) iha palásiu governu.
Liu husi intervensaun badak Diretór Ezekutivu FONGTIL Valentin Pinto nebe’e reprezenta organizasaun sosiedade sivil sira hateten katak, nia parte lori organizasaun sira ne’ebé maka pasa iha selesaun proposta hato’o apresiasaun boot ba komitmentu sira ne’ebé governu ida ne’e liu husi GASC oferese, atu bele kontinua servisu hamutuk liu husi polítika parseria ne’ebé iha.

“ami mós hanoin katak, tinan ida ne’e iha dinámika oituan ne’ebe la’o makas no kuaze besik proposta 300 ne’ebé submete mai iha ne’e, ita tais didi’ak no balun la hetan oportunidade maibé atu dehan katak la’ós tanba laiha kapasidade hodi hakerek ita-nia proposta sira ka ita la tuir rekezitus ne’ebé GASC propoin, maibé hare ba prioridade ne’ebe GASC nian tinan ne’e, ne’ebé tenke fo ba proposta ne’ebe tuir prioridade refere.” Tenik Diretór Ezekutivu FONGTIL

Aleinde ne’e Valentin Pinto dehan nia parte konvida maluk sira hotu tenke tau ba hanoin no hanesan kultura ida katak tama iha kompetisaun, balun liu no balun tenke hela, no ba organizasaun sira ne’ebé pasa hodi halo duni servisu didi’ak tuir proposta ne’ebé iha.
Iha fatin hanesan Koordenadór Gabinete Apoiu Sosiedade Sivíl (GASC sigla portugés) Eng. Joaquim da Costa Freitas aumenta katak, nia parte hakarak hato’o parabéns ba organizasaun sira ne’ebé maka konsege pasa iha selesaun proposta.

“ iha prosesu naruk no situasaun ne’ebé mais difisil iha tinan ida ne’e maka mais difisil tanba organizasaun ne’ebé maka parseiru balu la hatudu komportamentu ne’ebé di’ak no sira tenke elimina; GASC tenke aplika rekezitu foun ne’ebé ezije 30% ba kustu administrativa ba organizasaun, no 70% tenke ba iha grupu tarjetu. Ida ne’e obriga imi tenke halo ezersísiu ba planu orsamentu tuir rekezitus ida ne’e”dehan koordenadór GASC.

Enkuantu organizasaun ne’ebé maka asina kontratu ho GASC ba Etapa II ne’e organizasaun sosiedade sivíl totál hamutuk 21 no konta hamutuk ho sira ne’ebé maka asina iha etapa I hamutukk ona 56. 𝐑𝐄𝐌𝐀𝐓𝐀.
𝗜𝗻𝗳𝗼𝗿𝗺𝗮𝘀𝗮𝘂𝗻 𝐨𝐟𝐢𝐬𝐢𝐚́𝐥 𝙼𝗲́𝗱𝗶𝗮 𝐆𝐀𝐒𝐂