Adjunta GASC Distribui Materiál Agrikultura ba Grupu Tatoli Aldeia Aidac

Viqueque 21 Agostu 2025: kinta feira semana ne’e Adjunta Koordenadóra Gabinete Apoiu Sosiedade Sivíl distribui materiál agrikultura ne’ebé maka prepara husi parseiru GASC, Fundasaun Knua Haberan Comunidade (sigla F.KHC) ba grupu tarzeit Tatoli iha suku Bahalara-Uain, Postu Administrativu Viqueque Vila Munisípiu Viqueque.
Liu husi introdusaun badak Diretór Ezekutivu F.KHC Agosto Pinto hateten katak, grupu rua ne’ebé maka hetan fundus husi GASC ekipa Fundasaun Knua Haberan Comunidade kontinua akompaña rutina no fó treinamentu .
“apoiu ba tinan ida ne’e iha foka nafatin ba grupu ida uluk inklui grupu foun inklui mós estabelese sentru fini ne’ebé besik edifísiu KHC no husu ba adjuntu atu halo observasaun ba sentru fini integradu ne’ebé maka sei hakiak manu, fahi no ikan maka sei prosesu hela atividade ne’e fundus mai husi GASC rasik no ita nafatin tenta orsamentu sira ne’ebé maka mai husi GASC hodi apoiu komunidade sira oinsá maka bele hasa’e sira nia rendimentu família.” Tenik Agostino Pinto
Aleinde ne’e Reprezentante Administradór Postu Administrativu Viqueque aumenta katak, nu’udar liman ain governu nia iha munisípiu sempre akompaña nafatin parseira sira ne’ebé iha Viqueque laran nia atividade ba grupu tarzeitu sira.
Iha fatin hanesan Adjunta Koordenadóra Gabinete Apoiu Sosiedade Sivíl(GASC sigla portugés) Yasinta Lujinha C.das Regras hateten, kooperasaun ne’ebé maka KHC iha la’ós foun maibé la’o tinan barak ona no kontinua hetan konsiderasaun tanba servisu ne’ebé di’ak tebes husi sira.
“ho rezultadu ne’ebé maka ohin ita boot sira rona ami hare ho matan no avalia rezultadu kada tinan ne’ebé sira hatudu, no rezultadu ne’ebé sira iha hatudu katak apoiu ne’ebé maka através liu husi sira fó ba imi iha duni benefísiu liu liu ba komunidade sira ne’ebé maka simu fundus ne’ebé mai husi governu”. Tenik Adjunta Koordenadóra GASC.
Aleinde ne’e Adjunta Koordenadóra Gabinete Apoiu Sosiedade Sivíl afirma liu tan katak, fasilidade sira ne’e atu tulun no hafasil ita-nia servisu.
“ne’ebé labele mai depois ida ne’e halo fali problema ba ita, ne’ebé ha’u hare iha ne’e bee di’ak ladún iha problema, tanba atu halo atividade ortikultura ne’e presiza tebes bee no mós fasilidade sira seluk hanesan materiál”. Dehan Yasinta Lujinha C.das Regras
Hafoin entrega tia ekipamentu Adjunta Koordenadóra GASC ho ekipa kontinua halo kedas observasaun ba iha grupu ida ne’ebé maka halo atividade fini hanesan hakiak fahi, manu, ikan no halo atividade ortikultura. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂