Oe-Cusse 16 dezembru 2025 : foin lalais ne’e adjunta koordenadóra gabinete apoiu sosiedade sivíl (GASC sigla portugés) partisipa iha loron nasionál Tais iha Oe-Cusse ne’ebé maka partisipa mós husi koordenadór ZEEDOA Membros Autoridades inklui mós grupu benefisiáriu sira husi suku 7 mak hanesan suku Costa Grupu Qiumanteco, suku Nipani Grupu Inur Sacato, Suku Naimeco Grupu Moris Foun, no Suku Bobometo grupu Bitetu, Suku Lifau Grupu Lifau, Suku Bobocase Grupu Natnopo, Suku Lalisuk Grupu Kliso.
Tuir adjunta koordenadóra GASC Jacinta Luzinha hateten katak, tinan ida ne’e GASC apoiu organizasaun Assosiasaun Feto Mudansa Ekonomia Familia (AFMEF) ho rezultadu ne’ebé mak di’ak tebes kona ba produsaun tais grupu benefisiáriu sira.
“liu liu atu empodera inan feton sira no grupu benefisiáriu sira ne’ebé maka hala’o atividade ekonomia no oinsá atu prodús tais ne’ebé ho kualidade nune’e bele haforsa mós sira jestaun finanseiru no hakbiit ekonomia família uma laran, ho nia objetivu husi kompetisaun soru tais alin estudante sira ne’e oinsá atu promove nafatin ita-nia identidade tais no sai hanesan ita-nia kultura.” Dehan adjuntu koordenadóra GASC
Nia dehan kompetisaun ida ne’e hodi eleva liu tan alin sira nia abilidade liuliu ba soru tais nian kontinua nafatin promove sira liu husi kapasitasaun no skil sira seluk ne’ebé mak iha.
Iha fatin hanesan koordenadór ZEEDOA hateten katak, nia parte agradese ba organizasaun AFMEF ne’ebé maka organiza ona inan feton sira atu promove nafatin kultura liu liu ba identidade tais nian.
“apresia tebes ba alin sira ne’ebé nafatin promove tais duke estudantes sira ba halimar telefone no tiktok maibé nafatin suporta sira hodi mantein no promove tais” tenik nia
Enkuantu ema hamutuk 84 maka partisipa iha selebrasaun loron tais nasionál ne’e kompostu husi feto 76 Mane 8. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
