Mali-Ubu 15 jullu 2025 : foin lalais ne’e Adjunta koordenadóra GASC halo Lansamento Formasaun kona-ba hasa’e rendimentu ekonomia familiár iha Suco Mali-Ubu, Posto Administrativu Bobonaro, Municipio Bobonaro ne’ebé mak organiza husi Asosiasaun Servisu Redusaun Risku Dezastre (ASERD) no finansia husi GASC.
Diretór Asosiasaun Servisu Redusaun Risku Dezastre (ASERD) Pedro G. Moniz hatete, programa ne’e finansia husi GASC ho objetivu atu hasa’e produsaun hortikultura no kresimentu ekonomia familiár.
Aleinde ne’e Diretór Asosiasaun Servisu Redusaun Risku Dezastre (ASERD) komenta nia parte husu ba grupu benefisiáriu atu iha vontade hodi partisipa másimu iha atividade formasaun ne’e to’o remata ho tarjeitu sei kontribui benefísiu direita ba grupu komunidades.
Xefi Suko Mali-Ubu Quintilano Barros Fernandes aumenta nia parte agradese ba GASC ne’ebé tulun komunidades sira liu husi fundus subvesaun publika no husu ba grupu benefisiáriu katak atividade agrikultura bele kontribui produsaun rai laran no automatikamente hasa’e kresimentu ekonomia.
Maske nune’e Xefi Suko Mali-Ubu husu ba ASERD atu kapasita ho di’ak grupu benefisiáriu sira liu husi formasaun ne’ebé implementa nune’e sei aplika iha kintál laran.
Enkuantu estensionista ministériu agrikultura no pekuária, Suco Mali – Ubo, hatete parte estensionista agrikultura suku husu atu kolabora hamutuk hodi apoiu tékniku iha implementasaun atividade formasaun kona-ba hasa’e rendimentu ekonomia familiár.
Adjuntu administradór postu Bobonaro Jose Henriques aumenta atividades ne’e foka ba to’os na’in ne’ebé fornese ai han loron ba konsumidór(á) no husu partisipasaun másimu husi grupu benefisiáriu iha atividade ne’e ho di’ak no husu parte estensionista agrikultura suku atu nafatin fó advokasia Tekniku ba grupu benefisiáriu.
Aleinde ne’e Adjuntu Koordenadóra GASC Yasinta Lujina C. das Regras hateten , GASC tutela iha Gabinete Vice Premeiru Ministru Eng. Mariano Asanami nia ne’ebé servisu hamutuk ho organizasaun sosiedade sivíl ho objetivu atu tulun komunidades iha baze hodi haforsa, hakbiit no hala’o programa ne’ebé governu la to’o iha área rurál.
Ikus liu Adjunta Koordenadóra GASC husu ba grupu benefisiáriu hodi Kontinua dezenvolve setór agrikultura atu kontribui rendimentu ba família benefisiáriu.
