Maliana 13 Outobru 2025 : semana kotuk 10/10/2025 kapela Nossa Señora das Dores Corluli ne’ebé maka harii inisiativa husi Sarani no kontinua apoiu fundus husi Gabinete Apoiu Sosiedade Sivíl ba iha Dioseze Maliana hetan ona inaugurasaun husi Koordenadór GASC no bénsaun husi Bispu Dioseze Maliana.
Enkuantu kapela ne’e rasik durante konstrusaun mós kontribuisaun mai husi membrus governu balun no mós husi parókia Maliana.
Liu husi intervensaun amu parókia Maliana Pe. Valeiro Gusmão hateten kapela Nossa señora das Dosres Corluli ne’e hahú harii tanba inisiativa mai husi sarani sira ne’ebé maka iha unidade di’ak hodi servisu hamutuk hodi finaliza kapela refere.
“kapela ne’e boot maibé sarani iha Corluli uma kain hamutuk 77 de’it, maibé ita hanoin la’ós tinan ida agora ne’e de’it, maibé ita hare mós ba futuru, labarik ki’ik iha Corluli mós barak, dala ruma iha tinan 20 ou 30 ne’ebé sei mai, kapela ne’e mós sarani sira tama iha laran sei la to’o, no Parabens ba sarani Corluli sira tanba bele finaliza ona Capela ne’e.” Tenik amu parókia Maliana Pe. Valeiro Gusmão.
Iha fatin hanesan koordenadór gabinete apoiu sosiedade sivíl (GASC sigla portugés) Eng. Joaquim da Costa Freitas hateten, Ida ne’e rezultadu ida husi prosesu tomak husik kooperasaun entre Governo ho CET ne’ebé halo iha tinan naruk nia laran.
“reprezenta governu ami sente kontente tanba fisikamente bele hare rezultadu eziste iha fatin ida ne’e, Inagurasaun kapela Corluli liu husi prosesu tomak ne’ebé sarani la’o ona ho Amu Paroquia no Amu Bispo nia desizaun iha Diocese Maliana hodi aloka orsamentu mai kapela ida ne’e, ami mós apresia ho kooperasaun tinan naruk nia laran no rezultadu sira ne’ebé mak ita atinji ona, no iha lista sei iha tan obra lubuk ida ne’ebé mak sei la’o hela, tanba ne’e inaugurasaun ohin loron la’ós ikus, maibé sei kontinua ho obras sira ne’ebé mak la’o hela no besik atu finaliza.” Dehan koordenadór GASC
Eng. Joaquim da Costa Freitas aumenta nia parte hato’o mensajen ba sarani sira iha Capela Corluli ohin mai halo inaugurasaun ona ba kapela ne’e no iha imi-nia liman ona, no presiza atu halo moris kapela ne’e no kontinua halo kontribuisaun no halo manutensaun ba kapela ida ne’e, la presiza tane liman hela de’it ba parókia.
Enkuantu bispu dioseze maliana Dom Norberto do Amaral hateten, governo fo osan mai diocese no diocese aloka orsamentu ne’e hodi halo Capela sira no Sr. Joaquim hanesan koordenador husi Gabinete Apoio a Sociedade sivil mai hodi monitoriza de’it oinsa atu uza osan ne’e , ne’ebe akontese agora ne’e hatudu katak kontribuisaun husi governo mai diocese sai duni realidade ida ne’ebe konsege halo ona, kontrusaun sira hanesan Camara Eclesiaastica, residensia padre sira nian, ne’e resultadu husi orsamentu governo nian.
“parabens ba sarani kapela Corluli no krismante sira tamba bele realiza inagurasaun no krisma ne’e ho diak, maske uma kaik uitoan de’it maibe bele servisu makas hodi halo hotu kapela ne’e, imi nia servisu ho unidade, komprensaun ,no solidaridade hotu maka ohin ita bele finaliza Capela ne’e,parabens mos ba ita hotu ne’ebe mai hamutuk hodi selebra ona misa ida ne’e tamba iha kristu ita ida deit.”dehan dom Norberto do Amaral
Partisipa iha inaugurasaun kapela ne’e maka hanesan, Bispu dioseze Maliana, Amu parókia Maliana, Madres, koordenadór GASC, membru governu komandante PNTL munisípiu Bobonaro,autoridade lokál no sarani sira. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
