Dili 15 jullu 2025 tersa feira semana ne’e Centro Audiovisual Max Stahl Timor-Leste ( sigla CAMSTL) hala’o formasaun ba ninia funsionáriu sira kona ba jestaun administrasaun, jestaun finanseiru ba ninia funsionáriu sira ne’ebé maka hala’o iha Fundasaun Queshadip Colmera no atividade ne’e rasik hetan apoiu finanseiru husi GASC.
Entretantu treinamentu ne’e ho nia objetivu atu harii kompeténsia prinsipál sira iha jestaun projetu ba funsionáriu sira ne’ebé envolve iha planeamentu no implementasaun projetu sira.
Tuir Diretór Ezekutivu CAMSTL Eudicitio Pinto katak, nia parte agradese ba koordenadór GASC ne’ebé maka iha komitmentu apoiu nafatin ba CAMSTL iha tinan ida ne’e atu bele halo formasaun ne’ebé esensiál liu ba Centro Max Sthal tanba jestaun ne’e maka hanesan xave ba susesu CAMSTL.
“iha teknikamente Centro Audiovisual Max Stahl durante tinan 20 resin iha esperiénsia di’ak maibé atu halo Centru ne’e sai profisionál ita presiza tebes apoiu ne’ebé mai husi parseiru ne’ebé esensiál no sr. Justinho maka sei fasilita formasaun ida ne’e durante semana ida no kontinua akompaña to’o tinan ida ba Centro Audiovisual max Stahl”. Tenik Diretór Ezekutivu CAMSTL.
Liu husi abertura ba formasaun ne’e Koordenadór Gabinete Apoiu Sosiedade Sivíl (GASC sigla portugés) Eng. Joaquim da Costa Freitas hateten katak,formasaun ne’e hanesan parte ida hodi haforsa instituisaun no hakbiit kapasidade instituisaun.
“ne’ebé kapasidade instituisaun ne’e la’ós hakbiit de’it iha deminsaun ida, maibé hakbiit mós iha demisaun lubuk ida ne’ebé maka la’ós administrasaun de’it, maibé ko’alia mós iha kontestu lideransa, kontestu planu, kontestu monitorizasaun no avaliasaun, no kontestu finanseiru ne’ebé hola parte iha instrumentu sira ne’ebe haforsa instituisaun nia laran.” Dehan koordenadór GASC. . 𝐑𝐄𝐌𝐀𝐓𝐀.
Informasaun Ofisiál No Atuál Husi Média GASC
