Edukasaun Sidadania Mak Dalan Hodi Ema ba Komprende Kona-ba Direito No Devér Sidadaun Nian.

Ermera 18 Agostu 2025: sesta feira semana kotuk 15/08/2025 Conselho Nacional da Juventude dé Timor – (sigla CNJTL) liu husi Conselho Juventude Município Ermera realiza semináriu nasionál kona ba edukasaun sidadania ba juventude no estudante sira iha Munisípiu Ermera, tema ba semináriu ne’e maka “Edukasaun Sidadania Mak Dalan Hodi Ema Ba Komprende Kona Ba Direitu No Devér Sidadaun Nian”.
Prezidente CNJTL Maria Dadi Soares Magno hateten nia parte enkoraja juventude sira katak, CNJTL hanesan kakuluk ida ba organizasaun juventude sira hotu, no mós sai mahon ba juventude sira no husu ba joven atu banati tuir herois sira nia dalan hodi luta ba dezenvolvimentu país ida ne’e.
“CNJTL hakru’uk no respeita ba konstituisaun RDTL nian ho nune’e husu ita hotu atu hasa’e koñesimentu juventude nian hodi promove valór ukun rasik an no promove valór síviku.” Tenik Maria Dadi
Iha fatin hanesan Adjunta Koordenadóra GASC Yacinta aumenta papél GASC nian ba estudantes no organizasaun sosiedade sivíl iha munisípiu Ermera, no mós husu atu nafatin kolabora ho organizasaun sosiedade sivíl hodi tulun komunidade sira.
“ husu ba estudantes sira katak informasaun sira ne’ebé hetan bele hatutan ba kolega no família sira hodi bele hatene, no iha oportunidade sira ne’e bele haforsa ita-nia abilidade, no loke nia vizaun no hanoin krítiku ne’ebé furak iha futuru, hanesan estudantes ita-nia diretu mak atu eskola maibé ita-nia devér tenke estuda no ajuda inan-aman, no sai joven labele pasivu, sai joven tenke ativu, no joven ajente ba mudansa” Dehan Adjunta Koordenadóra.
Enkuantu atividade semináriu ne’e abertura husi reprezentante Prezidente Autoridade Munisípiu Ermera nian.
reprezentante PAM Ermera hateten katak, formasaun edukasaun sidadania importante ba joven no estudantes no fó espasu juventude oinsá atu motiva joven sira, husu ba joven sira partisipa ho másimu tanba edukasaun sívika ne’e pilár importante ba nasaun iha futuru. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂