Atabae 09 outubru 2025 : fulan kotuk 30/09/2025 ekipa GASC, halo monitorizasaun ba Programa ne’ebé implementa husi Organizasaun Santalun ne’ebé maka hetan apoiu fundus husi gabinete apoiu sosiedade sivíl (GASCsigla portugés) iha aldeia Limanaro Suku Rairobo, Posto Administrativu Atabae, Municipiu Bobonaro.
Enkuantu programa ne’ebé Santalun implementa iha suku ne’e mak hakbiit agrikultór iha área rurál ba sistema agrikultura integradu sustentavel orienta ba merkadu no reflorestasaun.
Aleinde iha parte hortikultura Santalun, organiza komunidade sira iha grupu hodi halo produsaun ba hortikultura, ho nia tipu modo sira ne’ebé mak komunidade sira prodús mak hanesan mostarda, alfase, kanko, brinjela, ai-manas, pepinu no seluk tan.
Entretantu parte reflorestasaun, komunidade sira halo ona viveirus ba ai-oan 10.000 hodi kuda iha komunidade sira nia toos iha tempu udan mai. Ai-oan sira ne’ebé komunidade sira prepara ona iha viveirus mak ai-kakeu, mahoni, ai-saria, Ai-kase manium, no ai-fuan sira hanesan: rambutan, sabraka no salak.
Por enkuantu komunidade aldeia Limanaro, sente kontente ho programa ne’ebé introdús husi Organizasaun Santalun, tanba bele benefísiu diretamente ba komunidade sira, liu husi produsaun hortikultura ne’ebé mak iha komunidade sira bele hetan rendimentu, no kuda ai no ai-fuan sira iha sira nia tos no bele konserva sira nia rai no proteje dezastre naturais sira no mós ho ai-fuan sira ne’ebé komunidade sira kuda bele fó mós valór ekonomia ba komunidade sira rasik.
Iha fatin hanesan Xefi Aldeia Limanaro, Antonio Halimau, hateten nia parte agradese ba Organizasaun Santalun ne’ebé hili ona komunidade iha nia aldeia mak sai benefísiu ba programa ne’ebé sira implementa no agradese mós ba governu liuliu GASC ne’ebé bele apoiu ona fundus hodi implementa programa ne’e iha nia komunidade.
“mezmu programa ne’e la’o iha grupu ne’ebé ki’ik maibé efetivu tebes no bele sai modelu hodi motiva komunidade sira seluk bele hala’o sira nia atividade agrikultura sira iha grupu.”tenik Antonio 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
