Eskola Bázika Filial Katólika Primeiru No Segundu Siklu Uatu-Ua, Hetan Ona Inaugurasaun

Baucau, Uatu-Ua 01 jullu 2025: ekipa Gabinete Apoiu Sosiedade Civil – GASC, lidera husi tékniku konfesoes relijiozu ne’ebé reprezenta Koordenadór GASC, partisipa iha inaugurasaun edifísiu EBFC primeiru no segundu siklu iha aldeia Uatu-ua, suku Gariwai , Postu Administrativu Baucau Vila Munisípiu Baucau.
Enkuantu iha reabilitasaun eskola refere responsabiliza husi kompañia Caidara-Lata Unip Lda, ne’ebé Finansiadu husi CET liu husi dioseze Baucau ho montante osan $ 39,148.71, durasaun servisu durante fulan hitu.
Vigario episcopal asuntu sosiál no edukasaun pe. Evaristo reprezenta Bispo Dioseze Baucau, hateten iha dioseze haka’as an atu hadi’a eskola katóliku sira ne’ebé pertense iha Dioseze Baucau, buat ne’ebé hakarak ne’e mak atu hasa’e rekursu umanu ne’ebé kualifikadu atu bele dezenvolve Timor ne’e ba oin.
“ tanba ne’e mak ita hotu nia esforsu atu kontinua hadi’a ba kondisaun eskola ne’ebé aat atu eskola iha kondisaun ne’ebé di’ak hodi hanorin ita-nia oan sira sai matenek.” Dehan Pe. Evaristo
Pe. Bernardo Manuel Luis, nu’udar diretór fundasaun são jose hato’o intervensaun, labele haree ba kualidade edifísiu de’it, edifísiu di’ak estudante sira laiha kualidade mós hanesan de’it, tanba ne’e husu husu ba profesór sira atu eduka estudante sira ho kualidade nune’e bele kompete iha futuru.
Pe. Trans nu’udar koordenadór CTD Baucau, aumenta inan aman sira ne’ebé hela besik iha eskola ne’e nia hare eskola ne’e tanba rikusoin forma oan sira sai matenek, ne’ebé husu ba inan aman no profesór sira nafatin kuidadu fatin eskola ne’e di’ak nafatin.
sorin seluk reprezentante prezidente autoridade munisípiu baucau iha nia intervensaun husu ba komunidade sira atu tau matan ba eskola ne’ebé mak reabilita ona, nune’e ninia ezisténsia bele metin nafatin.
Enkuantu reprezentante koordenadór GASC, Horacio Da costa hateten gabinete de apoio a sosiedade civil ne’ebé tutela iha gabinete Vice primeiru ministru asuntus sosiais no responsavel ba kooperasaun entre IX governu konstitusionál, ho konferénsia Episcopal Timorense (CET) dioseze Díli, Baucau no Maliana, dioseze Baucau liu husi CTD aprova orsamentu hodi reabilitasaun ba eskola ne’e, tanba hetan estragus husi anin boot.
“liu husi orsamentu ne’ebé governu atribui ba CET dioseze Baucau, governu atribui osan ba CET no CET aloka ba dioseze sira atu halo atividade tuir nesesidade kada dioseze iha, no ohin ita halo reinaugura eskola ida ne’ebé ita-nia esperansa boot prosesu aprendizajen la’o nafatin no kontinua laiha rohan tanba jerasaun foun kontinua mosu husi família sira ne’ebé hela iha fatin ne’e.
entretantu partisipa iha serimónia inaugurasaun ne’e mai husi reprezentante prezidente Baucau, Lideransa Lokal Suku Gariwai, padre relijiozu sira, diretór(a) eskola no komunidade iha aldeia Uatu-ua rasik. 𝐑𝐄𝐌𝐀𝐓𝐀.
Informasaun Ofisiál No Atuál Husi Média GASC