FONGTIL Hala’o Sosializasaun Mata Dalan Subvensaun Publika GASC, Iha Parte Leste

𝐁𝐚𝐮𝐜𝐚𝐮, 𝟎𝟏 𝐣𝐮𝐥𝐥𝐮 𝟐𝟎𝟐𝟓: FONGTIL hala’o sosializasaun ba mata dalan subvensaun publika husi Gabinete Apoiu Sosiedade Sivíl (GASC sigla portugés) ba membru FONGTIL iha rejiaun Leste kompostu husi Munisípiu Manatuto, Baucau, Viqueque no Lautem.
Liu husi intervensaun ba sosializasaun ne’e Diretór FONGTIL Valentim Pinto hateten, sosializasaun mata dalan subvensaun publika ne’e permite membrus FONGTIL no sira ne’ebé la’ós membru iha munisípiu atu akompaña esplikasaun kona ba lala’ok subvensaun publika husi GASC.
“sekretariadu FONGTIL hanoin katak iha nesesidade duni atu bele organiza enkontru sira hanesan ne’e nune’e husi parte GASC hodi halo esplikasaun ne’ebé maka kle’an kona ba lala’ok rekezitu sira ne’ebé presiza prienxe molok halo aplikasaun ba fundus ida ne’ebé oferese mai husi GASC.” Dehan Diretór Ezekutivu FONGTIL.
Iha fatin hanesan Reprezentante Prezidente Autoridade Munisípiu Baucau atuál xefe departamentu apoiu suku e apoiu organizasaun sosiedade sivíl no komunitáriu Joao Coreia hateten katak, nia parte sei servisu hamutuk ho sosiedade sivíl atu identifika organizasaun sosiedade sivíl sira ne’ebé maka eziste iha munisípiu Baucau.
“sosializasaun mata dalan subvensaun publika ne’e importante tanba mata dalan maka sei gia ita atu la’o tuir kona ba saida maka orsida perturba ba jestaun atendimentu ne’e , tanba laiha mata dalan maka ita labele halo buat ida, kuandu mata dalan iha maka ita sei la’o tuir hodi halo dezenvolvimentu iha setór sira.dehan Joao Coreia.
Koordenadór Gabinete Apoiu Sosiedade Sivíl (GASC sigla portugés) Eng. Joaquim da Costa hateten, governu sei tau atensaun ba organizasaun Sosiedade Sivíl, é nune’e mós la’ós mai de’it husi IX governu maibé apoiu ida ne’e mai kedas husi IV governu mai to’o IX governu.
“iha IV governu hodi realiza entre governu ho organizasaun sosiedade sivíl hahú iha IV governu tanba saida maka iha momentu ne’ebá ita-nia governu konsidera organizasaun sosiedade sivíl hanesan parseiru, tanba sira maka besik liu ba komunidade no koñese di’ak saida maka akontese iha ne’ebá tanba ne’e maka governu fó apoiu ne’e ba imi-nia inisiativa la’ós ko’alia de’it maibé dezenvolve iha proposta.”dehan Koordenadór GASC.
Enkuantu sosializasaun ne’ebé maka hala’o husi FONGTIL ne’e hetan apoiu finanseiru husi Gabinete Apoiu Sosiedade Sivíl. 𝐑𝐄𝐌𝐀𝐓𝐀.
Informasaun Ofisiál No Atuál Husi Média GASC