FONGTIL Hala’o Sosializasaun Matadalan Subvensaun Publika GASC iha Rejiaun Oeste.

Bobonaro 28 Agostu 2025: segunda feira foin lalais ne’e 25/08/25 FONGTIL hala’o sosializasaun matadalan subvensaun publika GASC ba membru FONGTIL iha rejiaun Oeste kompostu husi Ermera, Liquica, Bobonaro no Atauro.
Enkuantu objetivu prinsipál husi sosializasaun matadalan ne’e mak membru ONGs sira bele iha koñesimentu no oinsá bele asesu ba Fundus Subvensaun Publiku GASC, no atividade Sosializasaun Matadalan Subvensaun Publika GASC ne’e marka prezensa husi diretór FONGTIL no Koordenadór GASC.
liu husi diskursu badak Diretór Ezekutivu FONGTIL Valemtin Da Costa Pinto hateten sekretariadu FONGTIL kontinua organiza atividade hanesan ne’e hodi bele dezamina nafatin informasaun no koñesimentu kona-ba oinsá asesu ba fundus subvensaun publika GASC nian no bele hatene mudansa ba prosesu no lala’ok sira hotu, aleinde ne’e fahe informasaun ba malu kona-ba isu advokasia sira.
Nia aumenta organizasaun sosiedade sivíl nu’udar parseiru dezenvolvimentu governu nian sai hanesan ibun no matan ba governu hodi kontinua servisu profisionalizmu no haforsa ida-idak nia organizasaun no presiza servisu makas iha filleira sosiedade sivíl hodi servisu hamutuk ho Governu.
Iha fatin hanesan koordenadór gabinete apoiu sosiedade sivíl (GASC sigla portugés), Eng. Joaquim da Costa Freitas hateten, nia parte apresia FONGTIL nia servisu bele realiza atividade ne’e hodi halibur ita hotu iha ne’e.
“Mundu agora ne’e mundu kompetitivu katak kritéria mak manda, sistema demokrasia katak liberdade espresaun maibé labele hakat liu norma ne’ebé mak eziste sosiedade, tenke hatene regras no kritéria no respeita malu.”tenik Koordenadór GASC.
Entretantu Eng. Joaquim da Costa Freitas aumenta organizasaun sira ne’ebé hetan ona fundu GASC iha tinan ne’e no tinan barak ona iha avaliasaun partisipativu GASC sei hare mudansa saida mak sira halo ona iha komunidade nia leet.
“husi avaliasaun partisipativu ne’e mak sei sai hanesan kritéria ba tinan oin, espera katak husi GASC nia parte bele fahe no maluk sira bele komprende no evita kopia paste.” Dehan Koordenadór GASC
Rekorda mós katak, iha enkontru sosializasaun matadalan subvensaun publika ne’e partisipante hamutuk 38, feto 14 no mane 24 kompostu husi Membru ONGs husi Rejiaun Oeste 19, ekipa FONGTIL no Ekipa GASC. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂