Natarbora 21 jullu 2025: Fundasaun Juristas Advocacia foin lalais ne’e 16/07/2025 realiza atividade edukasaun sívika ba komunidade sira husi suku Fatuwake/Abat-oan, Postu administrativu Barique-Natarbora, Munisípiu Manatutu.
Enkuantu atividade ne’ebé maka Organizasaun Juristas Advocacia ne’e hetan apoiu finanseiru husi GASC, iha atividade ne’e partisipa direta husi reprezentante Gabinete Apoiu Sosiedade Sivíl (GASC sigla portugés).
Aleinde atividade ne’e nia objetivu prinsipál maka atu hasa’e koñesimentu komunidade sira nian relativamente ho aplikasaun lei nu.13/2017 kona-ba rejime espesiál ba definisaun ba titularidade bens imovel no lei nú.8/2017 kona-ba espropriasaun tanba utilidade públika.
Xefe suku Fatuwaque Abat-Oan iha abertura hateten atividade dezimina lei nu 13/2017 kona-ba rejime espesiál ba definisaun titularidade bens imovel no lei nu 8/2017.
Nia dehan primeira vez atividade akontese iha suku Fatuwaque Abat oan, tanba ne’e husu komunidade sira ne’ebé partisipa atu aproveita ho di’ak nune’e bainhira fila bele fahe informasaun ne’ebé hetan ho família no viziñu sira ne’ebé la konsege marka prezensa, nune’e bele ajuda hodi hamenus problema hadau malu rai no diskute malu tanba baliza rai.
Xefe Departamentu Edukasaun Sívika no Boa Governasaun Salvador Cruz hateten nia parte fó hanoin nafatin ba Fundasaun Jurista Advokasia hanesan parseiru ba GASC tenke halo servisu ho transparénsia no akontabilidade liuliu atividade no orsamentu ba iha ezekusaun nian.
“husu ba partisipantes sira katak iha formasaun edukasaun sívika ne’e importantes tebes ba partisipante sira hodi rona ho di’ak, hodi nune’e bele transforma fila fali ba maluk sira ne’ebé mak ohin la marka prezensa sosializasaun ida ne’e.”tenik Salvador
Rekorda katak atividade ne’e hetan partisipasaun másimu husi komunidade sira husi suku Fatuwaque Abat-oan hamutuk ema na’in 73 kompostu husi mane 53 no feto 20.
Atividade ne’e fasilita husi Dr. Tito Maia dos Reis nu’udar oradór prinsipál no apoiu husi Dr. Elias Godinho, Júlio Martins, Ribania dó Rego no Pascoela de Jesus
