Baucau 17 jullu 2025 : kuarta feira semana ne’e 16/07/2025 reprezentante Gabinete Apoiu Sosiedade Sivíl partisipa iha abertura formasaun lideransa ba konsellu suku Feto iha munisípiu Baucau ne’ebé maka hala’o husi Fundacão Pátria (sigla FP).
Enkuantu Fundação Pátria halo parte organizasaun sosiedade sivíl iha Timor-Leste, hala’o papél importante iha prosesu ba alkansa igualdade jéneru no mós hakbiit abilidade lideransa feto Timor-Leste no direitu fundamentál feto tenke envolve iha prosesu foti desizaun ne’ebé kualidade no sustentavel ba futuru ligadu ho dezenvolvimentu nasionál hahú husi baze.
objetivu prinsipál husi atividade ne’e maka atu bele hasa’e abilidade lideransa transformasaun feto konsellu suku, hodi partisipa ativu no kontribui ho kualidade iha prosesu dezenvolvimentu suku.
Liu husi abertura ba formasaun ne’e reprezentante Prezidente Autoridade Munisípiu Baucau hateten, nia parte agradese ba Gabinete Apoiu Sosiedade Sivíl ne’ebé mak fó ona fundus ba Fundasaun Patria hodi halo formasaun lideransa ba membru konsellu suku feto hanesan Xefe suku, Xefe Aledia, Delegada Aldeia, joven feto suku oinsá bele haburas nafatin feto.
“feto maluk sira iha baze hodi hasa’e sira nia koñesimentu hodi dezenvolve fali iha sira nia suku no aldeia ne’ebé mak sira hela ba, no liu husi formasaun lideransa ida ne’e nafatin husu feto maluk sira hodi aproveita oportunidade ida ne’e ho di’ak hodi bele dezenvolve ita-nia rai ida ne’e ho di’ak.”tenik reprezentante PAM Baucau
Iha fatin hanesan Xefe Departamentu Edukasaun Sívika no Boa Governasaun Salvador Cruz hateten nia parte fó hanoin nafatin Fundasaun Patria hanesan parseiru tenke halo servisu ho transparénsia no akontabilidade liuliu ba iha ezekusaun nian no atividade sira implementa tuir akordu ne’ebé mak iha.
“husu ba partisipantes membru konsellu suku feto, xefe Aleia Feto, Joven feto sira katak iha formasaun durante loron tolu ne’e, aproveita ho di’ak no liu husi formasaun bele hasa’e ita-nia koñesimentu no abilidade hodi transforma fila fali iha iha suku no aldeia ne’e mak ita ukun ba no bele hadi’a no dezenvolve ita-nia suku ho di’ak “. Tenik Salvador
Iha abertura ne’e hetan partisipasaun husi, reprezentante GASC, reprezentante prezidente autoridade munisípiu Baucau Fundadora Fundasaun Patria, no membru konsellu suku feto hanesan Xefe suku, Xefe Aledia, Delegada Aldeia, joven feto suku, hamutuk ema na’in 50 mesak feto.
