Dili 11 agostu 2025 : Segunda feira semana ne’e Fundasaun Sosiál Naroman (sigla FUSONA) kontinua hala’o formasaun ba lideransa IPTL sira, kona ba investimentu hodi estimula pastór/á sira iha IPTL hodi hatene jere aset sira sustentabilidade Ekonomia no Institusionál.
Liu husi introdusaun badak Diretór Ezekutivu FUSONA Julio Martins da Costa hateten katak, proposta ne’ebé maka FUSONA hatama ba iha Gabinete Apoiu Sosiedade Sivíl ne’ebé maka hetan admitidu ninia objetivu maka atu hare ba iha FUSONA nia vizaun ho misaun hodi responde ba iha planu estratéjiku ne’ebé maka korresponde ba tinan 10 oin mai.
“iha atividade lubuk ida ne’ebé mensiona iha proposta ita hatama ida maka treinamentu ne’ebé maka ita hala’o daudauk ho nia tópiku” Hametin Diversifikasaun Ekonomia Ba Dezenvolvimentu Sustentavel” objetivu husi treinamentu ida ne’e maka atu ita bele iha koñesimentu oituan ba iha ita-nia pendeta sira ho majelis sira ne’ebé maka responsavel ba ita-nia igreja iha kada kongregasaun ne’ebé ita iha territóriu tomak.” Dehan Julio Martins da Costa
Nia dehan formasaun ida ne’e mós atu hasa’e koñesimentu oinsá maka jere aset no rikusoin ne’ebé iha oinsá maka bele halo dezenvolvimentu to’o iha ne’ebá, tanba durante ne’e aset ne’ebé iha seidauk funsiona ho di’ak hodi hatama rendimentu.
Iha fatin hanesan Reprezentante Koordenadór Gabinete Apoiu Sosiedade Sivíl Rogerio Soares hateten katak, fundus ne’ebé apoiu husi GASC ba iha FUSONA ne’e hare ba iha programa komunitária maibé foka makas liu ba iha parte formasaun.
“tanba ita hanoin katak liu husi formasaun maka ita bele halo buat ruma, tanba molok ita halo buat ruma presiza informasaun ne’ebé maka di’ak no koñesimentu ne’ebé maka di’ak antes ita atu halo atividade ruma ba iha ita-nia komunidade.” Tenik Rogerio
Rekoorda mós katak atividade formasaun ne’e rasik abertura diretamente husi Reprezentante Koordenadór GASC iha salaun IPTL Comoro no formasaun ne’e sei termina iha kuarta feira semana ne’e. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
