Aileu 26 juñu 2025: Segunda feira foin lalais ne’e 23/06/2025 ekipa GASC ne’ebé kompostu husi diretóra nasionál Programação, Tekniku Espesializadu GASC hodi halo viajen ba Same hodi Responde ba Konvite FONGTIL hodi abertura Treinamentu Planu Estratejiku ba ONGs Rai-Klaran iha Same, Manufahi.
Enkuantu Objetivu husi Treinamentu ne’e atu hasa’e koñesimentu membru ONGs sira dezeñu planu estratéjiku ho métodu Project Cycle Manegement (PCM) ba membru ONG 23 iha Rejiaun Rai-Klaran ne’ebé kompostu husi munisípiu Aileu, Ainaro, Covalima & Manufahi.
Aleinde iha abertura treinamentu ne’e reprezentante Diretor FONGTIL Lourenco Tito Lopes hateten, totál membru FONGTIL hamutuk 270 ne’ebé kompostu ONGs Lokal, Nasional & Internasional, FONGTIL iha ninia mandatu 4 (Koordenasaun, Advokasia, Kapasitasaun no Dezemina Informasaun, Treinamentu ne’e bazeia rezultadu asesmentu FONGTIL nian iha tinan 2019 oinsá atu haforsa kapasidade institusionál membru sira, treinamentu ne’e mós atu responde ba rekezitus husi parseiru sira inklui GASC.
reprezentante diretór FONGTIL ne’e mós hato’o agradesimentu no apresiasaun Prezidenti Autoridade Munisipiu Manufahi nia tempu no mós ba GASC ninia apoiu fundus ba realizasaun treinamentu ne’e.
Iha fatin hanesan Prezidenti Autoridade Munisipiu Manufahi Luis Marçal da Costa Tavares hateten nia parte agradese ba FONGTIL ne’ebé hili Munisípiu Manufahi hodi fasilita Formasaun ba ONG sira iha Munisípiu Manufahi, hamutuk ONGs 23 Kompostu husi ONG Aileu, Ainaro, Covalima no Manufahi.
“Liu-husi treinamentu ne’e bele hasa’e Koñesimentu hodi apoiu planu estratéjiku sira ho di’ak hodi Apoia Governu Lokál ba implementasaun programa no atividade sira ne’ebé fó benefísiu ba komunidade, ONG nu’udar Parseiru importante ba Governu Lokal no nia prezensa iha komunidade sira importante tanba hatene komunidade sira nia evidénsia iha rurál ho área ki’ik ka boot importante liu mak rezultadu ba povu.” Dehan Luis Marçal da Costa Tavares.
Maske nune’e Prezidenti Autoridade Munisipiu Manufahi ne’e mós husu ONG sira atu koopera ho Governu/Estadu liu husi atividades ne’ebé mak iha, Papél ONG iha rai ida ne’e importante tebes, husu nafatin ONG sira nia kontribuisaun, hato’o nafatin krítika Konstrutivu, Governu lokál konsidera liuhusi kritika sira ne’e hodi hadi’a di’ak liu tan prestasaun servisu sira iha futuru.
Entretantu Diretora Nasional Programasaun GASC Suzety H. P. M. Soares aumenta nia parte apresia no agradese ba FONGTIL ne’ebé organiza no fasilita ona formasaun ba membru ONG sira, Liu husi formasaun ne’e bele hasa’e no hakle’an liu tan koñesimentu sira liuliu ligadu oinsá atu dezenvolve planu estratéjiku organizasaun nian ho métodu Project Cycle Management hodi haforsa liu tan kapasidade institusionál kada organizasaun nian.
reprezentante koordenadór GASC ne’e mós husu membru ONG sira ne’ebe tuir formasaun atu aproveita formasaun ne’e ho di’ak ho nune’e bele tulun organizasaun.
Partisipa iha abertura treinamentu ne’e maka Reprezentante Diretor FONGTIL, Prezidenti Autoridade Munisipiu Manufahi no reprezentante Koordenador GASC reprezenta husi diretóra Nasional Programasaun, Sra. Suzety H. P. M. Soares. 𝐑𝐄𝐌𝐀𝐓𝐀.
𝗜𝗻𝗳𝗼𝗿𝗺𝗮𝘀𝗮𝘂𝗻 𝐨𝐟𝐢𝐬𝐢𝐚́𝐥 𝙼𝗲́𝗱𝗶𝗮 𝐆𝐀𝐒𝐂
