Ermera 22 Outubru 2025 : foin lalais ne’e 20/10/2025, Adjunta Koordenadóra Gabinete Apoiu Sosiedade Sivíl (GASC sigla portugés) Yasinta Lujina C. das Regras, ho ekipa partisipa atividade serimónia lansamentu kolleita modo ho variedade iha munisípiu Ermera, postu administrativu Railaco, Suku Lihu.
Enkuantu iha intervensaun, Adjunta Koordenadóra GASC informa katak GASC la’ós foin mak eziste maibé eziste kedas iha tinan 2007 mai husi inisiativa atuál Primeiru Ministru.
“GASC eziste mai husi ita-nia Maun Bo’ot Kay Rala Xanana Gusmao iha altura ne’ebá hanesan Primeiru Ministru, ho hanoin katak, governu presiza servisu ho sosiedade sivíl hodi halo kolaborasaun di’ak ho komunidade, tanba haree ba Governo mesak dala ruma laiha kbiit boot hodi bele halo buat hotu-hotu, entaun governu halo parseria ho sosiedade sivíl ne’ebé kada tinan governu oferese fundus ba sosiedade sivíl hodi aplika.” Dehan adjunta koordenadóra.
Maske nune’e nia afirma Atividade ne’ebé mak iha ne’e kontinuasaun husi tinan kotuk depois dé halo avaliasaun rekomenda ba asosiasaun katak, labele mai oferese de’it materiál ba komunidade tanba dala ruma la iha nia sustentabilidade , entaun presiza mós iha formasaun ne’ebé efetivu hodi tulun komunidade atu adapta ba iha mudansa Klimatika.
Por enkuantu adjunta koordenadóra aumenta tan katak, komunidade mak tenke iha inisiativa tanba programa sira ne’ebé Sociedade sivíl sira lori mai hanesan reforsa de’it ita boot sira, depois dé sira remata iha ne’e ita boot sira mak tenke halo kontinuasaun ba produtu agrikultór sira ne’e .
Iha sorin seluk Autoridade lokál Suku Lihu, haktuir, parte autoridade, kontente tebes ba apoiu hirak ne’ebé mai husi governu nasionál ba komunidade sira, ami mós akompaña sira nia atividade iha ne’e, sira nia atividade ne’e hatudu rezultadu di’ak kompara tempu uluk ne’ebé sira kuda ho maneira tradisionál nia rezultadu ki’ik liu kompara ho agora, agora sira hetan formasaun husi tékniku sira husi NGO ACVLLN, hanorin sira kuda ho maneira modernu no hatudu rezultadu di’ak no populasaun liuliu grupu benefisiáriu sira kontente liu.
Aleinde ne’e reprezentante ONG ACVLLN, komenta nia parte agradese ba IX governu konstitusionál liu husi GASC ne’ebé konsidera proposta ne’ebé reprezenta komunidade sira nia preokupasaun tuir tarjetu ne’ebé iha, agradese mós ba lideransa autoridade suku Lihu ba kolaborasaun no kooperasaun di’ak durante ezisténsia iha suku ida ne’e.
“atu informa de’it ba ita hotu katak komunidade iha ne’e maioria ekonomia dependénsia ba agrikultura, antes sira halo atividade hortikultura maibé dala barak liu sei uza sistema tradisionál ho maneira kari de’it entaun dala barak hatudu nia rezultadu kuantidade menus no entermus nia kualidade mós menus. Depois ita fó asisténsia formasaun tékniku oinsá mak kuda tuir modernu nian, depois sira kuda tuir agora hatudu nia rezultadu di’ak tebes.” Tenik nia 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
