Lospalos 17 jullu 2025: semana kotuk loron 9/07/2025, xefe departamentu programa Empoderamento Komunitáriu, ne’ebé reprezenta Koordenadór Gabinete Apoiu Sosiedade Sivíl (GASC sigla portugés ), lansa programa hakbiit kapasidade membru grupu agrikultura ba produsaun hortikultura ne’ebé implementa husi Organizasaun FRATERNA, iha Aldeia Luarai no Bauro, Suku Bauro, Postu Administrativu Lospalos, munisípiu Lautem.
iha lansamentu programa ne’e, Reprezentante Koordenadór GASC, Rogerio Soares, hateten nia parte husu ba organizasaun FRATERNA atu implementa programa ne’e ho didi’ak hodi bele fó duni mudansa ruma ba komunidade benefisiáriu sira, nune’e mós husu ba grupu benefisiáriu sira tenke ativu iha formasaun sira ne’ebé organizasaun FRATERNA sei fasilita hodi mellora liu tan koñesimentu membru grupu sira nian iha tékniku kultivasaun hortikultura nian, no utiliza apoiu materiál agrikultura sira ne’ebé hetan ho di’ak no responsabilidade hodi nune’e bele fó duni benefísiu ba grupu benefisiáriu sira.
Diretór organizasaun FRATERNA, Venancio dé Jesus, aumenta nia parte agradese ba governu liu husi GASC ne’ebé fó fiar no apoiu fundus ba organizasaun FRATERNA hodi implementa programa iha komunidade.
Diretór FRATERNA mós afirma asaun sira ne’ebé sei realiza hamutuk ho grupu benefisiáriu sira mak fasilita formasaun kona-ba tékniku kultivasaun hortikultura, hahú husi prepara fini, fatin kultivasaun (rai), tékniku kultivasaun no kolleita produsaun.
“fasilita formasaun kona-ba jestaun rezultadu produsaun, tékniku sira husi FRATERNA, sei halo akompañamentu rutina ba grupu, apoiu fini no materiál agrikultura ba grupu benefisiáriu”.tenik Diretór FRATERNA
Iha fatin hanesan Xefi suku Bauro, Florindo, agradese ba organizasaun Fraterna tanba hili nia komunidade sai benefisiáriu ba programa, nu’udar autoridade komunitáriu nakloke halo kooperasaun ba parseiru hotu ne’ebé iha hanoin ho programa di’ak atu implementa iha suku.
Nia hateten tan katak maioria komunidade Suku Bauro, moris nu’udar agrikultór, entaun ho apoiu sira hanesan organizasaun FRATERNA bele eleva liu tan koñesimentu agrikultór sira nia oinsá hadi’a sira nia produsaun hodi bele fó rendimentu ne’ebé di’ak liu tan ba família agrikultór sira.
Lansamentu programa ne’e, partisipa husi autoridade komunitáriu hanesan Xefi suku no Xefi aldeia, ekipa tékniku agrikultura husi Organizasaun FRATERNA, no membru grupu agrikultór sira ne’ebé sai benefisiáriu ba programa.
