Samalete 13 Outubro 2025: Kapela Samalete inaugura ba dala rua ona, inaugurasaun ba uluk iha 1992 ne’ebé inaugura husi Dom. Carlos Filipe Ximenes Belo no iha tinan 2025 inaugurasaun ba dala rua husi Dom Virgilio Cardeal do Carmo da Silva.
Iha intervensaun Xefe Suku Samalete hateten, hanesan xefe suku haksolok tebes tanba ohin Kapela Samalete hetan ona bensa husi Dom Virgilio Cardeal do Carmo da Silva, tanba komunidade Samalete totál populasaun 1817, kompostu husi mane iha 834 pessoas no Feto iha 964 pessoas abitantes.
Nia dehan kapela Samalete inaugura tanba hetan suporta Amu parókia, sarani Samalete,Veteranos no parte Governo liu husi gabinete apoio sosiedade sivíl (GASC sigla portugés).
Autoridade lokál ne’e aumenta nia parte agradese ba koordenadór GASC sr. Joaquim da Costa Freitas, tanba nia odamatan nakloke mak ohin loron bele kompleta ita-nia kapela ida ne’e.
koordenadór gabinete apoiu sosiedade sivíl(GASC sigla portugés) Eng. Joaquim da Costa Freitas hateten, ohin loron inaugura tan kapela ida iha Samalete ne’e aumenta tan progresu ida husi ami nia servisu.
“sente kontente tanba kapela ne’e hahú ho kontribuisaun sarani nian iha tinan naruk, hafoin iha 2023 ha’u mai vizita iha fatin ne’e no 2024 xefe suku lori proposta tuir kedas no iha 2025 ita bele inaugura kapela Sta. Terezinha do Menino de Jesus ne’e.” tenik Koordenador GASC
Eng. Joaquim da Costa Freitas aumenta nia parte fó parabéns ba Sarani hotu iha Samalete tanba ho imi-nia kontribuisaun hotu mak kapela ida ne’e bele remata no ohin ita selebra, no kontinua halo fatin ne’e sai hanesan uma orasaun ne’ebé moris ho atividade ne’ebé iha.
“Ita hotu agradese ba Primeiro Ministro no Vice Primeiro Ministro iha IX Governo ne’ebé laran luak kontinua estabelese polítika ida hodi realiza nafatin parseria entre igreja ho governu Timor-Leste.”tenik koordenadór GASC
Iha fatin hanesan Dom Virgilio Cardeal do Carmo da Silva aumenta hodi uma kreda nia naran hakarak agradese ba parte governu nian ne’ebé liu husi Gabinete Apoio á Sociedade sivíl, apoiu ona hodi ohin ita bele inaugura kapela ne’e no mós misaun husi Australia liu hudi Padres Jesuita sira ne’ebé fó apoiu tinan barak liu ba hodi tau fatuk inan iha fatin ne’e, no kapela ida ne’e esforsu ema lubuk nian no ohin ita inaugura ona.
“Parabens ba Joven sira ne’ebé simu sakramentu Krisma, ohin ita Selebra festa Sta. Terezinha do Minino de Jesus nian no tanba Santa Terezinha do Minino de Jesus ne’e sai Santa tanba nia família, no tinan hirak liu ba Papa Fransisco foti Sta. Terezinha nia Inan ho Aman sai hotu santu/á husi Sta. Terezinha nia istória bele sai inspirasaun ba inan ho aman no família sira iha Suku Samalete, atu bele lao tuir sira nia ezemplu moris nian hodi sai família ne’ebé di’ak.” Dehan Dom Virgilio Cardeal do Carmo da Silva.
Partisipa iha inaugurasaun kapela ne’e mai husi Dom Virgilio Cardeal dó Carmo da Silva,koordenadór GASC, Amu Parokia Railaco, padre, Madre no sarani sira hotu. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
