Tibar 23 jullu 2025: kapela ne’ebé maka maka harii husi sarani sira iha aldeia Raimeta suku Tibar Postu Administrativu Bazartete Munisípiu Likisa, ne’ebé maka seidauk finaliza ho di’ak daudauk ne’e Gabinete Apoiu Sosiedade Sivíl kontinua apoiu fundus atu bele finaliza kapela Nossa señora dó Rosario Raimeta iha tinan ida ne’e.
Liu husi lansamentu ba kontinuasaun reabilitasaun no konstrusaun kapela Nossa Señora Dó Rosario Raimeta Xefe suku Tibar Marcelino Lopes hateten nia parte agradese ba governu IX ne’ebé maka liu husi Gabinete Apoiu Sosiedade Sivíl hodi kontinua apoiu fundus ba finalizasaun kapela ne’ebé maka harii mai husi inisiativa sarani sira nia.
Iha fatin hanesan Koordenadór Gabinete Apoiu Sosiedade Sivíl (GASC sigla portugés ) Eng. Joaquim da Costa Freitas hateten, governu nia prezensa apoiu atu aumenta tan saida maka sarani sira tau ona hodi remata tia kapela ne’e.
“ami husi Gabinete Apoiu Sosiedade Sivíl sente kontente halo desizaun hodi fó apoiu ho valór osan ne’ebé maka ki’ik, maibé presiza tebes sarani sira nia kontribuisaun ba iha servisu, tanba hanoin mai husi imi maka presiza kontribui ba iha servisu voluntáriu.” Tenik Koordenadór GASC
Maske nune’e Koordenadór GASC husu ba sarani sira atu servisu ho fuan nune’e bele finaliza lalais kapela ne’e hodi inaugura no asina plaka iha tinan ida ne’e.
