Liquica 15 novembru 2025: komunidade hamutuk uma kain 353 ho nia abitantes hamutuk 1298 iha suku Vaviquina aldeia Lebumeta, Pametapu,Darulara no Nunuana Munisípiu Liqueca Postu Maubara asesu ona bee moos ne’ebé maka implementa husi Cruz Vermelha Timor-Leste hanesan parseiru GASC nian.
Liu husi mensajen badak Xefe Aldeia Lebumeta hateten, nia parte sente kontente tebes ho programa CVTL nia, ne’ebé maka dada bee moos ba komunidade, liu husi apoiu orsamentu husi GASC nia.
Enkuantu Prezidente Autoridade Munisípiu Liquica Paulino Ribeiro aumenta, nia parte husu ba komunidade sira atu kuidadu bee ne’e ho di’ak, nune’e bele uza ba tempu naruk, tanba ne’e komunidade sira maka tenke halo kontribuisaun osan kada fulan centavus 50 to centavus 100 nune’e torneira ruma aat karik bele hadi’a fila fali.
Prezidente CVTL Madalena Hanjam komenta, CVTL nia papél maka servisu hamutuk ho komunidade hodi dada bee moos, atividade ne’e la’ós hala’o de’it iha suku Vaviquina maibé hala’o moos iha territóriu Timor-Leste.
“atividade dada bee moos ne’e hetan apoiu finanseiru husi GASC ho montante orsamentu $,20,050,55 hodi implementa 100% inklui servisu hamutuk ho komunidade hodi finaliza obra ne’e ho nia distánsia 5 kilómetru ba uma kain 353 ho nia abitante 1298”. Tenik Madalena Hanjam
Iha fatin hanesan Koordenadór Gabinete Apoiu Sosiedade Sivíl (GASC sigla portugés) Eng. Joaquim da Costa Freitas hateten, CVTL hanesan parseiru GASC nia, sira nia prezensa ne’e atu fasilita komunidade.
“atu hateten katak sidadaun hotu hotu iha Timor-Leste iha direitu hanesan asesu ba bee moos atu nune’e Timor oan hotu iha fatin ne’ebé de’it bele sente ukun an, la’ós ukun an iha Dili de’it maibé ukun an ne’e ba Timor oan hotu. Tenik koordenadór GASC. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
