Ermera 09 Outubro 2025 : foin lalais ne’e 7/10/2025, Kordenador gabinete apoiu sosiedade sivíl(GASC sigla portugés), entrega mákina prosesamentu kafé kualidade unidade 32 no mákina poda kafé unidade 6 ba grupu kafekoltur sira iha Ermere.
Entretantu benefisiáriu ba materiál sira ne’e mai husi grupu kafekultor husi Suku Matata família uma-kain 10, Suku Urahou família uma-kain 10 no Suku Mertutu Familia uma-kain 12, Grupu kafekultor sira ne’e organiza husi Organizasaun Hametin Demokrasia no Igualidade (HDI) iha Municipiu Ermera.
Aleinde iha eventu entrega materiál ne’e, koordenadór gabinete apoiu sosiedade sivíl(GASC sigla portugés) Eng. Joaquim da Costa Freitas hateten, nia parte husu ba grupu kafekultor sira utiliza fasilidade sira ne’e ho di’ak no responsabilidade hodi hakmaan servisu kafekultor sira nian.
“uza materiál sira ne’e ho di’ak nune’e bele uza iha tempu ne’ebé naruk no tau atensaun ba nia manutensaun, bainhira akontese fallansu ruma labele sobu rasik se la hatene nune’e husu apoiu ba sira ne’ebé iha koñesimentu kona-ba oinsá hadi’a mákina.” Tenik Kordenador GASC.
Maske nune’e Eng. Joaquim da Costa Freitas aumenta nia parte husu mós ba HDI hodi hamutuk ho grupu sira estabelese regras utilizasaun no manutensaun ba mákina nian nune’e bele uza iha tempu naruk, hamutuk ho grupu sira estabelese mekanizmu oinsá garante kontinuasaun grupu nian iha futuru, pelumenus mákina ne’ebé grupu sira simu agora aat sira iha ona kapasidade sosa fali mákina foun labele fila fali ba manuál.
Relasiona ho entrega materiál prosesamentu kafé ba kafekultor ne’ebé organiza husi HDI, tanba iha tinan 2025, HDI hetan apoiu husi governu liu husi gabinete apoiu sosiedade sivíl (GASC), hodi implementa programa empoderamentu komunitáriu liu husi projetu kafé, agro floresta no vida moris.
Atividade sira ne’ebé HDI implementa iha Suku Matata, Mertutu no Urahou mak organiza grupu kafekultor sira halo reabilitasaun kafé liu husi poda kafé huun tuan no manutensaun, prepara viveirus kafé oan no ai-mahon kafé nian, hodi kafekultor sira bele kuda fila fali ba fatin sira ne’ebé kafé mate ona.
Iha serimónia entrega materiál hirak ne’e, koordenadór GASC, akompaña husi reprezentante Prezidente Autoridade Munisipál Ermera, Sekretária Assuntu Sosiais no Organizasaun, Paulina do Rosário Lemos, reprezentante husi Servisu Munisipál Agrikultura Munisípiu Ermera no diretór HDI, Eurico Ediana da Costa. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
