Dili, 𝟎2 𝐣𝐮𝐥𝐥𝐮 𝟐𝟎𝟐𝟓: kuarta feira semana ne’e Koordenadór Gabinete Apoiu Sosiedade Sivíl (GASC sigla portugés) Eng. Joaquim da Costa Freitas hatuur fatuk inan ba konstrusaun sala ba TB inklui moru protesaun ba klínika Bairopite Lanud.
Tuir Prezidente Fundasaun Klínika Bairopite Inacio dos Santos katak, nia parte agradese ba IX governu liu husi Gabinete Apoiu Sosiedade Sivíl hodi aloka fundus liu husi aproximasaun ne’ebé maka klínika halo ho lideransa GASC nia, nune’e bele halo ona lansamentu.
“lansamentu ne’e halo ba konstrusaun rua maka hanesan moru protesaun ba klínika no seluk fali maka konstrusaun ba sala moras TB no konstrusaun ba X-ray nia maka la konsege lansa tanba teknikamente sei iha prosesu AND”. Tenik Inacio dos Santos.
Enkuantu Inacio dos Santos aumenta liu tan katak, tuir dadus husi tuberkuloze nasionál hatudu katak, daudauk ne’e Klínika Bairopite kobre hela moras TB kuaze um tersu husi kazu nasionál.
Iha fatin hanesan Koordenadór Gabinete Apoiu Sosiedade Sivíl(GASC sigla portugés) Eng. Joaquim da Costa Freitas hateten katak, Gabinete Sosiedade Sivíl ne’e hanesan Gabinete tékniku ida ne’ebé maka tutela ba iha Vice Primeiru Ministru maibé liga mós ba iha Primeiru Ministru.
“konstrusaun ba fasilidade sira ne’ebé iha hanesan moru bele proteje klínika ho seguru hodi hala’o servisu no sala ba TB ne’e di’ak ba pasiente TB atu halo tratamentu ho konfortável tanba ne’e xefe suku Bairopite presiza tau matan mós ba konstrusaun ne’e atu bele lao ho di’ak”. Tenik Koordenadór GASC.
Partisipa iha lansamentu ne’e maka hanesan Koordenadór GASC, Diretór Nasionál Saúde Munisípiu Dili, Xefe Suku Bairopite, padre, inklui funsionáriu no médiku klínika Bairopite. 𝐑𝐄𝐌𝐀𝐓𝐀.
Informasaun Ofisiál No Atuál Husi Média GASC
