PRADET Organiza Treinamentu negósiu ki’ik ba ema na’in 22

Dili 29 jullu 2025: tersa feira semana ne’e organizasaun Psychosocial Recorvery And Devolopment in Eas Timor (sigla inglés PRADET) ne’ebé maka hanesan parseiru ba Gabinete Apoiu Sosiedade Sivíl (GASC sigla portugés) hala’o treinamentu negósiu ki’ik atu suporta grupu vulneravel sira ne’ebé maka asesu ona ba atendimentu servisu psikososial iha PRADET.
Enkuantu objetivu husi programa ne’e maka atu hasa’e koñesimentu ba benefisiáriu sira di’ak liu tan hodi asegura implementasaun atividade negósiu ki’ik ho di’ak liu no kontrola sira nia negósiu ho kualidade no sustentavel.
Liu husi abertura ba formasaun ne’e reprezentante GASC atuál diretóra nasionál programasaun Suzety Herlayla P.M Soares hateten katak, nia parte apresia ba iha parseiru PRADET ne’ebé maka organiza ona formasaun ne’e ba grupu vulneravel sira no maluk kbiit-laek sira.
“espera katak treinamentu ida ne’e maluk sira bele aproveita ho didi’ak tanba bele asesu husi programa Psychosocial, no husi treinamentu ne’e espera bele motiva no mós bele hasa’e koñesimentu maluk sira nia atu bele aprende di’ak liu tan oinsá bele halo negósiu ki’ik ida bele ajuda ekonomia iha ita boot sira nia uma laran.” Tenik Suzety.
Iha fatin hanesan programa Manager PRADET Herculano Granadeiro hateten katak, treinamentu ne’e hola parte iha programa ida nune’e ko’alia kona ba dezenvolvimentu formasaun ne’e mós hola parte iha ne’ebá.
“hasa’e koñesimentu ne’e dezenvolvimentu ida, dala barak ita rona dezenvolvimentu ba liu iha Estrada, eskola, farmásia buat sira ne’e, maibé labele haluhan katak dezenvolvimentu ne’e mai husi buat ki’ik, tanba ne’e apresia ho governu liu husi GASC nia programa no vontade ne’ebé maka fahe osan liu husi parseiru sira hodi lori liman ne’e to’o ba iha ita boot sira.” Dehan Herculano.
Rekorda katak, partisipante sira ne’ebé maka tuir formasaun ne’e hamutuk ema na’in 22 ne’ebé maka mai husi munisípiu Aileu, Manatuto, Liquesa no ermera no formasaun ne’e rasik fahe ba parte rua ida halai ba negósiu ki’ik no ida seluk maka liga ba agrikultura.