Buibela 04 outubru 2025 : Primeiru-Ministru (PM) IX Governu Konstitusionál, Kay Rala Xanana Gusmão, Inaugura Kapela Buibela-Lena Sentru Afaloicai, ne’ebé lokaliza iha Foho Beremeta ho Sabrica-Ulu ninia hun besik Foho Matebian.
Enkuantu Serimónia inaugurasaun ne’e hala’o iha Sábadu (04/10/2025) semana kotuk.
“Imi bele kontente tanba inaugura ona kapela ida-ne’e. Nune’e husu ba joven sira atu mai misa, labele ba buka mak problema iha fatin-fatin, husu mós ba inan-aman sira Domingu tenke lori oan sira mai misa. hanorin sira hakbesik an ba igreja”, dehan Primeiru-Ministru.
Iha fatin hanesan, Prezidente Autoridade Munisípiu Baucau, Veneranda E. M. Lemos Martins agradese ba Primeiru-Ministru no Ministra Solidariedade Sosiál no Inkluzaun, Verónica das Dores ne’ebé fó apoiu hodi kapela ida-ne’e konsege harii no Inaugura.
“Lori povu Munisipiu Baucau agradese ba Ita Boot sira-nia apoiu, no entidades hotu-hotu ne’ebé apoiu ona harii kapela ida-ne’e, maske dalan naruk maibé ita bele atinji saida mak ita hotu nia hakarak ba Buibela-Lena atu iha kapela ida”, katak Veneranda.
Enkuantu iha inaugurasaun kapela ne’e partisipa mós husi koordenadór gabinete apoiu sosiedade sivíl (GASC sigla portugés) Eng. Joaquim da Costa Freitas. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
