Lautem 30 𝐣𝐮𝐧̃𝐮 𝟐𝟎𝟐𝟓 : Sexta-Feira semana kotuk 27/06/2025 reprezentante GASC, lideradu husi Tekniku konfesoes Religiosos GASC, ne’ebé reprezenta koordenadór GASC partisipa lansamentu primeira pedra iha kapela São Fransisco dé Assis Pairara – Lautem
Liu husi intervensaun Prezidente Komisaun Venancio Xavier hatete, kapela refere nia kondisaun aat kleur ona hahú kedas iha tinan 2015 até agora, agradese wain ba IX Governu Konstituisional liu husi GASC ne’ebé fo apoiu fundus.
“ami, ho konfiansa ne’ebé ami hetan sei finaliza obra refere ho di’ak tuir planu ne’ebé iha” dehan komisaun organizadóra.
Maske nune’e husi Administrador Postu Lautem Anacleto Fernandes Xavier aumenta nia parte agradese ba Governu liuliu ba GASC ne’ebé fo ona apoiu fundus ba konstrusaun kapela St. Francisco de Assis Pairara.
“ne’ebé durante sira ba misa ho distánsia dook, no tinan ida ne’e hetan ona tulun husi governu hodi konstrui kapela, ho apoiu ne’ebé governu fo hanesan valores di’ak tebes hodi hametin sira nia fiar, ho nune’e nia mós husu ba estrutura komisaun no sarani sira atu servisu ho responsabilidade ba apoiu ne’ebé governu tenke ezekuta tuir planu ne’ebé iha.”
Dehan Anacleto Fernandes Xavier
Iha fatin hanesan padre parókia Pascoal Natalino Soares Moniz hateten, momentu ida ne’e sarani hotu sente orgullu no kontente tanba bele marka tan istória ida iha fatin ida ne’e postu Lautem suku Pairara.
“Agradese ba Lideransa GASC no nia ekipa tomak ne’ebé ho laran luak bele korresponde sarani Pairara sira nia preokupasaun hodi harii sira nia kapela, ne’e sai nu’udar sarani Pairara sira nia mehi no esperansa hori uluk kedas to agora, no ohin ita halo lansamentu primeira pedra ba kapela São Fransisco de Assis Pairara.”
reprezentante koordenadór GASC Horacio G. da Costa, iha nia intervensaun hatete katak ba apoiu ne’ebé GASC oferese husu ba komisaun sira atu jere ho di’ak tuir planu ne’ebé iha, GASC hatene apoiu ne’e natoon de’it hodi responde ba preokupasaun ne’ebé iha.
“no apoiu ida ne’e atu konstrui de’it kapela ne’e, komunidade sira mak sei halo servisu ho voluntariamente nu’udar sentidu pertensia ba kapela ida ne’e, ho nune’e dala ida tan husu komisaun ezekuta tuir planu ne’ebé imi iha, no ami nia parte mós sei mai halo monitoriza to’o obra ne’e remata.”dehan Horacio da Costa
Enkuantu Lansamentu primeira pedra ba konstrusaun kapela St. Francisco de Assis Pairara-Lautem hetan partisipa husi Administrador Postu Administrativu Lautem, Reverendo Padre Paroquia Lautém, koordenadór Eskola Marista Lautem, entidade relevante sira, Xefe Suku Pairara, Estrutura Komisaun ba Konstrusaun Kapela Pairara no mós sarani sira husi suku Pairara ne’ebé pertense ba kapela refere São Fransisco de Assis Pairara. 𝐑𝐄𝐌𝐀𝐓𝐀.
𝗜𝗻𝗳𝗼𝗿𝗺𝗮𝘀𝗮𝘂𝗻 𝐨𝐟𝐢𝐬𝐢𝐚́𝐥 𝙼𝗲́𝗱𝗶𝗮 𝐆𝐀𝐒𝐂
