Ermera 26 juñu 2025: Assosiasaun Sentru Estudu Ba Paz No Demokrasia hala’o abertura ba formasaun lider, kona ba lideransa no jestaun iha organizasaun atividade refere realiza iha suku Fatuquero Munisipiu Ermera.
Entretantu iha abertura ne’e hetan partisipasaun másimu husi Autoridade lokál husi postu Railaco, Xefe suku Fatuquero Xefe aldeia husi Palimanu no delegada husi suku Caitarahei.
Liu husi abertura xefe suku Fatuquero Eóncia Trindade hateten nia parte hato’o agradesimentu profunda ba iha ekipa ezekutivu husi Assosiasaun Sentru Estudo ba Paz no Demokrasia tanba halo ona kolaborasaun durante ne’e ho di’ak hodi atinji objetivu ne’ebé Assosiasaun planeia hela,no momentu ne’e mós nu’udar lider ida iha suku Fatuquero enkoraja ba nia joven sira atu aproveita formasaun sira ho didi’ak durante loron lima.
“atu nune’e hodi bele dezenvolve no hakbiit, haboot no haluan imi-nia koñesimentu sira iha área lideransa no mós área Jestaun nian, formasaun sira hirak ne’e nu’udar parte importante ida atu kapasita joven sira oinsá maka bele sai joven kreativu no inovativu husi prezente ba futuru, posibilidade boot kuandu imi iha ona koñesimentu ne’e ba futuru bele sai lider no mós bele harii imi-nia organizasaun rasik tuir esperiénsia no materiál sira ne’ebé maka durante ne’e hetan iha formasaun”. Tenik xefe suku Fatuquero
Xefe Departamento Edukasaun Sivika no Boa Governasaun Salvador Cruz aumenta fó hanoin nafatin Assosiasaun Sentru Estudo ba Paz no Demokrasia hanesan parseiru tenke halo servisu ho transparénsia no akontabilidade liuliu ba iha ezekusaun nian.
Aleinde ne’e Salvador Cruz hatutan nia parte husu ba partisipantes sira katak iha formasaun durante semana ida, aproveita no oportunidade ida ne’e ho di’ak hodi nune’e bele sai joven ne’ebé mak di’ak ho hanoin ne’ebé kreativu, konstrutivu no inovativu, nafatin dezenvolve no hakbiit koñesimentu iha área lideransa nian bele implementa fali iha sosiedade, suku no aldeia ne’ebé mak hela ba.
Fó hanoin mós katak partisipa iha abertura ne’e mai husi GASC, asosiasaun sentru Estudo ba Paz no Demokrasia, autoridade lokál inklui joven sira ne’ebé lokaliza iha suku Fatuquero, totál partisipante ne’ebé partisipa iha abertura ne’e hamutuk 40 kompostu husi feto 21 no mane 19. 𝐑𝐄𝐌𝐀𝐓𝐀.
𝗜𝗻𝗳𝗼𝗿𝗺𝗮𝘀𝗮𝘂𝗻 𝐨𝐟𝐢𝐬𝐢𝐚́𝐥 𝙼𝗲́𝗱𝗶𝗮 𝐆𝐀𝐒𝐂
