Dili 22 jullu 2025 : Organizasaun Ra’es Hadomi (sigla RHTO) hala’o atividade formasaun ba organizasaun ema ho defisiénsia sira kona ba planu asaun nasionál ema ho defisiénsia 2021-2030, konvensaun kona ba direitu ema ho defisiénsia.
Enkuantu atividade ne’e rasik hala’o iha salaun Cruz Vermella durante loron 3 hahú husi 21-23 jullu 2025.
Objetivu husi formasaun ne’e atu hasa’e koñesimentu ema ho defisiénsia sira nian kona ba planu asaun nasionál ema ho defisiénsia (2021-2030, konvensaun kona ba diretu ema ho defisiénsia (sigla CRPD).
iha abertura ne’e, Diretór Ezekutivu RHTO Joazito dos Santos, hateten nia parte agradese ba GASC tanba hetan apoiu fundus husi governu liu husi Gabinete Apoio sosiedade sivíl (GASC sigla portugés).
“ohin loron bele realiza atividade formasaun ba organizasaun defisiénsia sira kona-ba kompromisu estadu no governu Timor-Leste prinsípiu internasionál, konvensaun kona-ba direitu ema ho defisiénsia (CRPD), Papel DPOs, Analiza DNAP & orsamentu jerál estadu (Livrru II no PAA), RHTO mós sei kontinua fo tan formasaun ba Embaxador Liña Ministeriu sira no Autoridade Lokal iha Munisipiu Lautem Postu Administrativu Lorehe no Ainaro iha Postu Administrativu Maubesse.” Dehan Joazito.
Iha fatin hanesan reprezentante GASC Salvador Cruz aumenta nia parte agradese ba Organizasaun Ra’es Hadomi Timor Oan (RHTO), pela primeira vés asesu ba fundus husi GASC, hanesan parseiru foun husu nafatin halo koordenasaun no kolaborasaun ho GASC bainhira iha difikuldades liuliu ba atividade no implementasaun ezekusaun orsamentu nian.
“husu nafatin ba Organizasaun Ema ho Difisiensia sira ne’ebé mak ohin mai tuir formasaun ida ne’e aproveita ho oportunidade ne’e ho di’ak nune’e bele hakbiit ou haforsa fali ita boot sira nia organizasaun no ba futuru organizasaun ne’ebé mak funsionamentu di’ak no saudavel.” Tenik salvadór
diretóra Asosiasaun Esperanca Feto Defisiénsia (AEFD) Madalena da Costa hateten nia parte hato’o agradese wain ba governu Timor-Leste nia apoia ba RHTO, liu husi gabinete apoiu sosiedade sivíl (GASC), hodi kapasita no hasa’e organizasaun ema ho defisiénsia sira nia koñesimentu kona-ba planu asaun nasionál ema ho defisiénsia, CRPPD no analiza orsamentu jerál estadu (OJE).
Orlando Tilman Nunes Husi Asosiasaun Defisiénsia Timor-Leste (ADTL), afirma espetasaun ba formasaun durante loron tolu, hodi bele haforsa liu tan Organizasaun ema ho Defisiénsia sira iha área boa governasaun nian.
Atividade ne’e rasik partisipa husi reprezentante GASC ne’ebé maka hanesan apoiu fundus ba iha organizasaun RHTO.
