Serimónia Lansametu Konstrusaun Sala Estuda ba Oan Kiak sira iha Orfanato Beata Laura Vicuña Laga, Tomagua

Baucau. Laga 18 Agostu 2025: Loron Sesta Feira semana kotuk 15/08/2028 Koordenadór GASC, hatuur fatuk inan ba konstrusaun Sala estuda ba oan kiak sira orfanatu Beata Laura Vicuña iha postu Laga munisípiu Baucau Laga, iha Tomagua.
Enkuantu serimónia lansamentu ne’e marka prezensa husi Rai Na’in, Diretór Kompañia, reprezentante madre provinsiál kongregasaun FMA no Koordenadór Gabinete Apoiu Sosiedade Sivíl (GASC sigla portugés).
Iha serimónia lansamentu ne’e reprezentante Madre Provinsial kongregasaun Filha dé Maria Auxiliadora (FMA) hateten nia parte agradese ba IX Governo ne’ebé mak liu husi Gabinete Apoiu Sosiedade Sivíl, hodi tulun ona oan kiak sira hodi konstrui sala estuda ba labarik sira hodi bele estuda ho hakmatek, no prepara an ba futuru.
“tanba durante ne’e fatin Estuda laiha atu bele uza, nune’e refeitóriu no sala estuda tau hamutuk de’it no mós bainhira enkontru ho inan aman sira, tanba ne’e difikulta tebes ami nia atividade sira no ladún konveniente ba sira atu konsentra di’ak liu tan atu estuda, obrigada barak ba ita boot sira nia kolaborasaun no laran di’ak hodi tulun atu bele prepara fatin di’ak ba oan kiak sira.” Tenik nia
Iha fatin hanesan Rai Nain hateten nu’udar rai na’in reprezenta komunidade iha ne’e, rai ne’ebé atu halo obra ne’e iha tian 30 liu ba matebian Padre Joao dé Deus Pires nia tempu nia rasik ho Padre matebian mak mai hare fatin ida ne’e.
“ depois ha’u rasik mak entrega rai ne’e ba Salesiana Dom Bosco hodi halo eskola no fó ba na’in Madres FMA atu loke asrama ba ita-nia oan kiak sira.” Tenik rai Nain
Enkuantu koordenadór gabinete apoiu sosiedade sivíl (GASC sigla portugés) Eng. Joaquim da Costa Freitas hateten nu’udar gabinete ki’ik ida ne’ebé tutela iha Vise Primeiru Ministru ba asuntu sosiál, lakohi temi imi oan kiak maibé atu hateten alin sira mai iha ne’e tanba iha ne’e iha oportunidade di’ak atu imi bele aprende.
“ Madre sira nia Misaun edukasaun ne’e madre no padre sira mak sai formadór hodi forma labarik sira sai husi ne’e tuir ita-nia espetativa katak, sai sidadaun ne’ebé mak di’ak no sidadaun ne’ebé mak iha responsabilidade, ne’e duni seidauk fó parabéns tanba ohin foin hahú, mais atu fó hanoin katak ita oferese fatin ne’e ba irmán sira no irmán sira la’ós halo eskola ne’e ba Laga oan maibé kontribui ba edukasaun Timor oan tomak.” Tenik koordenadór GASC.
Maske nune’e Eng. Joaquim da Costa Freita akresenta liu tan katak, remata iha ne’e imi iha ona imajinasaun ida katak Timor mak klibur oan iha ne’e tanba iha ne’e halibur ona imi husi Municipio hotu-hotu ne’ebé mak halo imi interconnecting iha futuru tanba imi-nia jornada iha iha fatin ne’e sei hotu no sei hakat liu ba oin.
“ Imi mai husi prosesu ne’ebé mak sei ki’ik mai hela ona iha ne’e atu aprende buat ruma, ba alin sira hotu katak, atu muda ita-nia moris ne’e laiha dalan seluk só úniku mak edukasaun. edukasaun mak prepara imi ba di’ak no imi-nia moris ba oin laiha ema seluk atu muda ita-nia moris se ita rasik la esforsu, ba alin sira hotu IX Governu liu husi gabinete apoiu sosiedade sivíl oferese hela obra ida ne’e ho valór ki’ik ba konstrusaun sala estudu e espera katak fasilidade ne’e bele ajuda imi, no ba kompañia mensajen badak halo obra ne’e ho di’ak nune’e bele utiliza ba tempu naruk no agora lansa aban komesa hahú halo ona servisu”. Dehan Eng. Joaquim da Costa Freitas. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂