SHC hala’o formasaun abilidade Pratika Paz no semináriu edukasaun prevensaun ba moras.

Dili 01 agostu 2025 : foin lalais ne’e Adjunta koordenadóra GASC, Yasinta Lujina C. das Regras, abertura atividade treinamentu abilidade prátika paz no semináriu edukasaun Prevensaun ba Moras no VBJ durante loron tolu (3) ba prizioneiru juvenil iha prizaun Becora.
Iha abertura ne’e Adjunta koordenadóra GASC, hateten nia parte husu ba prizioneiru juvinil sira atu labele hanoin beibeik buat ne’ebé sira komete, maibé tenke hanoin ba oin no evita aktus violénsia, ne’ebé prejudika ita-nia Liberdade.
“formasaun no treinamentu sira ne’e hodi hasa’e abilidade, koñesimentu no esperiénsia , atu nune’e bainhira imi termina no kumpre responsabilidade iha fatin ida ne’e, bele tulun imi bainhira imi sai husi fatin ne’e ba moris hamutuk fali ho família no sosiedade.’ Tenik Yasinta
Iha fatin hanesan Diretór SHC Eusebio Abdias Abrantes afirma katak objetivu husi treinamentu ne’e maka atu harii dame ba maluk prizioneiru, mak oinsá ajuda maluk prizioneiru sira hodi komprende sentidu dame no importante atu fó desizaun atu hakmatek iha situasaun konfrontasaun no oinsá hasa’e abilidade no eskill bainhira fila husi fatin prizaun bele tulun sira hodi hetan servisu no kria servisu ba nia an rasik.
Maske nune’e diretór estabelesimentu Prizional Becora, aumenta nia parte agradese ba IX governu konstitusionál liu husi Gabinete Apoio Sosiedade Civil GASC no ONG Sharis Haburas Comunidade SHC, ne’ebé sempre mai kolabora ho ami hodi halo atividade formasaun no treinamentu ba maluk prizioneiru, hein katak atividade sira hanesan ne’e sei la para no kontinua hodi tulun no ajuda ita maluk prizioneiru sira. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂