Uma Pas Baucau Sosializa Direitu Sidadania Hodi Prevene Violénsia Bazeia ba Jéneru iha Família no Sosiedade.

Baucau 21 agostu 2025: kinta feira semana ne’e Uma Pas Baucau hala’o sosializasaun Direitu Sidadania Hodi Prevene Violénsia Bazeia Ba Jéneru Iha Família no Sosiedade ba Komunidade Sira iha Postu Administrativu Vemase Munisípiu Baucau.
Atividade ne’e Uma Pas Baucau hala’o tanba hetan apoiu finanseiru husi Gabinete Apoiu Sosiedade Sivíl (GASC sigla portugés)
Liu intervensaun Diretóra Uma Pas Baucau Felismina Belo hateten katak, objetivu halibur hamutuk iha ne’e ho razaun forte ida ne’ebé Uma Pas Baucau hahú iha 2009 hodi hahú halo atendimentu direita ba vítima sira, violénsia bazeia ba jéneru.
“maibé até adata tinan 16 ona ita-nia vítima sira aumenta, dala barak feto no labarik sira maka sai vítima nune’e Uma Pas hetan rekomendasaun lubuk ida husi autoridade lokál komunidade xave sira presiza tun mai atu ko’alia ho komunidade Xave sira, tanba ne’e ohin loron ita hamutuk iha ne’e hanesan kontinuasaun servisu Uma Mahon atu ita hamutuk hodi halo protesaun ba labarik no feto sira” dehan Felismina.
Enkuantu Xefes suku Vemase Tasi Carlos Freitas hateten, nia parte apresia ba sosializasaun ne’e tanba dala barak autoridade lokál mós rezolve problema ne’ebé iha suku laran tuir kultura, hodi kontra lei maibé nu’udar xefe suku hakarak nia komunidade moris iha Paz no estabilidade nia laran.
Iha fatin hanesan reprezentante PAM Baucau Maria Selestina aumenta katak, nia parte husu ba partisipante sira ne’ebé partisipa iha sosializasaun ne’e atu bele transforma fali informasaun ne’e ba feto maluk sira seluk.
Liu husi abertura ba sosializasaun ne’e Adjunta Koordenadóra Gabinete Apoiu Sosiedade Sivíl(GASC sigla portugés) Yasinta Lujinha C.das Regras afirma katak, GASC nafatin iha kompromisu boot liu liu lakohi iha prosesu dezenvolvimentu ida ne’e ema balun sente la hola parte iha prosesu ne’e.
“ liu liu ita ko’alia kona ba husik ema balun iha kotuk, tanba ne’e maka asuntu sira ne’e kontinua luta hela oinsá atu halakon violénsia halo prevensaun ba violénsia sai mós prioridade oinsá ita tenke kontinua apoiu ka tulun, husi Gabinete Apoiu Sosiedade Sivíl no apoiu ne’e tinan 3 ona tanba konsidera asuntu ne’e importante”. Dehan adjunta koordenadóra GASC. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂