Natarbora 26 setembru 2025: sesta feira semana ne’e liu husi Diálogu Komunitária iha postu Natarbora, munisípiu Manatuto ne’ebé maka organiza husi FONGTIL Vise Primeiru Ministru, Ministru Koordenadór Asuntus Sosiais No Ministru Dezenvolvimentu Rurál No Abitasaun Komunitária Eng. Mariano Asanami Sabino hateten, atu lori produtu lokál tama iha merkadu internasionál tenke muda mudansa mentalidade ba iha setór agrikultura.
“tanba ne’e maka mudansa mentalidade, maneira kuda, maneira halo jestaun ba setór agrikultura ne’e importante ho nune’e maka joven tenke partisipa, la’ós agrikultura identiku fali ho katuas sira, agora la’ós tempu ona kaer ai-suak tanba rai boot, ida ne’e ha’u sempre dehan uza ona tratór, hakarak ka lakohi ita tenke uza ita-nia teknolojia lae ita la ba”.tenik Vise Primeiru Ministru Eng. Mariano Asanami Sabino.
Aleinde ne’e Eng. Mariano Asanami Sabino komenta, ai han ne’ebé ita atu han ne’e maka sei dependénsia hatudu katak ita-nia ukun an ne’e seidauk kompletu, hakarak polítiku ne’e soberanu, nasaun soberanu ai-han mós tenke soberanu tanba soberania ai han ne’e importante.
“han saida maka ita iha, no kuda saida maka ita han ba ita nia saúde, entaun ita kuda hahán ne’e maka orgániku para ita-nia saúde ne’e di’ak, ita han etu maka barak liu kabun maka sa’e kompara ho ita-nia isin la sa’e.” Tenik Vise Primeiru Ministru Eng. Mariano Asanami Sabino
Entretantu serimónia diálogu komunitária ho tema Haforsa Jestaun Fundu Petrolíferu Ho Efisiénsia, Efikásia Rezilente No Sustentavel Ba Moris Di’ak Povu Timor-Leste, komunidade sira liu husi Xefe suku postu Natarbora nia hato’o rekomendasaun lubuk ida ba iha Vise Primeiru Ministru atu toma konsiderasaun bainhira projetu tasi mane realiza ona nune’e komunidade bele sente dezenvolvimentu no labele sai vítima ba dezenvolvimentu nasaun nian.
Rekorda mós katak, partisipa iha Diálogu Komunitária entre komunidade, organizasaun sosiedade sivíl ho IX Governu maka hanesan Vise Primeiru Ministru II, Sekretáriu Estadu Eletrisidade, Prezidente Autoridade Munisípiu Manatuto, PDHJ, no Diretór(á) sira husi liña ministériu sira, komunidade, sosiedade sivíl, xefe suku no entidade sira seluk tan. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
