Aileu 22 dezembru 2025 : sábadu semana kotuk adjunta Koordenadóra GASC inaugura ona bee moos ba komunidade iha aldeia Tabulasi suku Seloi Kraik Munisípiu Aileu hodi utiliza ba nesesidade bázika enkuantu implementasaun bee moos ne’e rasik implementa husi CVTL no apoiu finanseiru husi Gabinete Apoiu Sosiedade Sivíl.
Liu husi intervista sekretáriu Jerál Cruz Vermelha Timor-Leste (sigla CVTL) Agapito hateten katak, inaugurasaun bee moos ida ne’e fundus mai husi IX Governu Konstitusionál através liu husi Gabinete Apoiu Sosiedade Sivíl ne’ebé maka CVTL hanesan parseiru estratéjiku ba iha GASC.
“montante orsamentu ba implementasaun ba projetu bee moos iha aldeia Tabulasi ne’e hamutuk $ 18.000 hodi dada bee moos ho nia distánsia 2.5 kilo no komunidade ne’ebé maka sai benefisiáriu ba bee moos tuir relatóriu hamutuk uma kain 60 ho ninia abitante hamutuk 600 resin” Tenik sekretáriu jerál CVTL Agapito
Maske nune’e Agapito aumenta nia parte apela ba komunidade grupu GMF ne’ebé maka entrega ona materiál ba sira, atu kontinua jere bee moos ne’e ho di’ak no kontinua nafatin labele to’o de’it tinan ida ka rua maibé CVTL hakarak to’o tinan lima mai, bee di’ak nafatin to futuru tanba ne’e komunidade hotu tenke fó nafatin kontribuisaun.
Iha fatin hanesan reprezentante PAM Aileu hateten, komunidade sira tenke utiliza bee moos ne’e ho di’ak, ba nesesidade báziku inklui mós utiliza ba setór agrikultura hanesan kuda ai-han no hakiak animál.
Entretantu Adjunta Koordenadóra Gabinete Apoiu Sosiedade Sivíl (GASC sigla portugés) Yasinta Lujina C. das Regras hateten bee moos importante ba ema hotu atu utiliza ba nesesidade loroloron ninia, no bee moos sai hanesan fatór importante ba dezenvolvimentu moris nia.
“ezemplu sira bele halo ba atividade hortikultura hodi bele uza ba nesesidade uma laran, bee moos bele uza ba hasa’e rendimentu família nian ne’ebé maka iha ona, no responde ona ba ita-nia inan feton sira no labarik sira nia difikuldade ne’ebé maka durante ne’e sira hasoru tanba ne’e ita espera bee moos besik ona ba sira, komunidade mós bele halo ona mudansa ba sira nia moris.”tenik Adjunta Koordenadóra GASC
Aleinde ne’e Yasinta Lujina C. das Regras afirma liu tan katak, nia parte husu ba komunidade atu kuidadu bee ne’e ho di’ak tanba na’in maka komunidade.
Partisipa iha inaugurasaun bee moos ne’e maka Vise Presidente CVTL Marcal Freitas Magno, adjuntu Koordenadóra Gabinete Apoiu Sosiedade Sivíl (GASC sigla portugés) Yasinta Lujina C. das Regras, reprezentante PAM Aileu, xefe suku no komunidade sira. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
