DÍLI, 13 Maiu 2026 — Adjunta Koordenadora Gabinete de Apoio a Sosiedade Civil (GASC), Yasinta Lujina C. das Regras, halo abertura ba atividade formasaun kursu regulares ne’ebé oferese aprendizajen iha área Lian Inglés, Lian Koreanu, Komputadór no Gitarra.
Atividade formasaun ne’e realiza iha Comoro Child and Youth Center (CCYC), Suku Fatuhada, Postu Administrativu Dom Aleixo, Munisípiu Dili.
Iha nia intervensaun, Adjunta Koordenadora GASC hateten katak programa formasaun ne’e hetan partisipasaun husi ema ho perfil no grupu idade oioin, inklui ema ho defisiénsia, labarik feto no mane, no joven sira.
“Ha’u haree katak partisipante sira barak tebes no iha inklusividade iha programa ne’e. Ema ho defisiénsia, labarik feto no mane, no joven sira iha interese atu tuir formasaun edukasaun non-formal, hanesan Lian Inglés, Lian Koreanu no Komputadór,” dehan Yasinta.
Nia subliña katak liuhusi formasaun sira ne’e, partisipante sira bele eleva no haforsa koñesimentu no abilidade, ne’ebé importante atu ajuda sira prepara-an no aumenta kapasidade atu konkore iha merkadu servisu iha futuru.
Nia mos husu no enkoraja ba partisipante hotu atu kontinua tuir prosesu aprendizajen no kompleta formasaun to’o remata, hodi bele hetan benefísiu máximu husi programa ne’e.
Aleinde koñesimentu no abilidade, Adjunta Koordenadora GASC mos fó rekomendasaun ba Comoro Child and Youth Center (CCYC) atu presta atensaun ba kondisaun ambiente no seguransa iha sentru formasaun.
Nia hateten katak CCYC lokaliza besik merkadu, nune’e presiza konsidera aspetu seguransa, liuliu ba labarik sira no ema ho defisiénsia (EhD), atu sira bele partisipa iha atividade formasaun ho seguru no komfortável.
Programa kursu regulares ne’e espera bele sai nu’udar meiu ida atu dezenvolve kapasidade, koñesimentu no talentu partisipante sira, no prepara sira atu kontribui positivamente ba sosiedade no futuru Timor-Leste.
