Maliana, 28 Setembru 2026 — Fundação Mosteiro de Santa Clara Tunubibi – Maliana, realiza inaugurasaun ba Sala Polivalente Centro de Acolhimento Social Santa Clara de Assis (CASSCA) iha segunda-feira, 28 Setembru 2026.
Eventu inaugurasaun ne’e hala’o ho prezensa husi Coordenador Gabinete de Apoio à Sociedade Civil (GASC), Kleru, Professores, Inan-Aman no Labarik sira ne’ebé realiza atividade lor-loron iha sentru refere.
Iha okaziaun ne’e, Madre Superiora Komunidade, Ir. Maria Fernanda O.S.C., hato’o nia gratidaun ba IX Governu Konstitusionál tanba apoiu ne’ebé fó, kontribui ba realizasaun projetu ida ne’e. Nia hateten katak sala polivalente ne’e sei sai espasu importante ida atu simu, eduka, forma no promove labarik no joven sira.
“Que esta Sala Polivalente seja muito mais do que um edifício : que seja um lugar de encontro, de aprendizagem, de fraternidade e de esperança, onde cada criança e cada jovem se sinta acolhido, valorizado e amado”.
Iha nia intervensaun, Coordenador GASC mós hatudu Governu nia kompromisu atu kontinua promove aprendizajen Língua Portuguesa, liuhusi Projeto Mais Português, ho objetivu atu kria kondisaun ne’ebé di’ak liután ba timoroan sira atu ko’alia no dezenvolve kapasidade iha Língua Portuguesa, ne’ebé sai nu’udar língua ofisiál Timor-Leste.
Governu, liuhusi GASC, tinan-tinan loke oportunidade ba Kongregasaun Relijioza Katólika atu asesu ba Apoiu Fundu Subvensaun Públika, ho objetivu atu liga ho sira-nia misaun sosial, liuliu iha área edukasaun, formasaun no dezenvolvimentu morál ba komunidade.
Inaugurasaun Sala Polivalente CASSCA ne’e la’ós de’it remata projetu ida, maibé mós marka tranzisaun ba faze foun, ne’ebé manutensaun no kuidadu ba edifísiu sei kontinua ho responsabilidade husi Irmã sira no Inan-Aman sira.
Liuhusi espasu foun ida ne’e, espera katak iha tinan hirak tuir mai, labarik no joven barak liután bele dezenvolve sira-nia koñesimentu, abilidade no kompeténsia, liuliu iha área Língua Portuguesa no área edukasaun seluk.
Hafoin diskursu sira, labarik sira hato’o aprezentasaun dansa no poezia, ne’ebé fó ambiente kontente no ksolok ba partisipante sira.
CASSCA utiliza espasu ne’e sai hanesan okupasaun tempu livre labarik sira nian ho atividade edukasaun no formasaun, hodi hakle’an sira-nia koñesimentu no dezenvolve sira-nia talentu iha área oioin, inklui Língua Portuguesa, Língua Inglesa, Matemática, Desenho, Artes, Ginástica, inklui atividade edukativa no rekreativa seluk.
