Ainaro, 12 Outubru 2026, Diretora Nasional Programasaun, Gabinete de Apoio à Sociedade Civil (GASC), Sra. Suzety H. P. M. Soares, partisipa iha atividade koileta produsaun modo no fehuk-ropa orijinal Hatu builico nian iha Suku Nunumoge, Postu Administrativu Hatu-Builico, Munisípiu Ainaro.
Iha nia intervensaun, Diretora husu ba komunidade benefisiáriu sira atu kontinua servisu ho di’ak, tuir orientasaun tékniku sira ne’ebé durante ne’e hetan ona liu hosi formasaun kona-ba hortikultura.
” Hein katak siénsia no materiál sira ne’ebé ita-boot sira hetan bele tulun no ajuda ita-boot sira nia atividade hodi bele hasa’e rendimentu ekonomia família”, dehan Sra. Suzety Soares.
Atividade ne’e hetan apoiu fundus husi Subvensaun Públika tinan 2026 husi GASC ba Organizasaun Associação Combatente Veteranos da Luta Libertação Nacional (ACVLLN).
Atividade ne’e finaliza ho susesu no hetan partisipasaun másimu husi komunidade lokál.
