Coordenador GASC Inaugura Projetu Finalijasaun Mesquita Al-Fatah iha Afabubo, Lautém

Lautém, 23 Setembru 2026 — Coordenador Gabinete de Apoio à Sociedade Civil (GASC), Eng. Joaquim da Costa Freitas, ofisialmente inaugura Projetu Finalizasaun Mesquita Al-Fatah, iha Suku Afabubo, Postu Administrativu Luro, Munisípiu Lautém, iha loron 23 Setembru 2026.
Mesquita Al-Fatah hahú husi inisiativa komunidade musulmana iha Suku Afabubo, hamutuk ho Fundasaun An-Nur Dili. Tanba limitasaun rekursu finanseiru, Fundasaun An-Nur husu apoiu husi IX Governu RDTL iha tinan 2025, liuhusi Gabinete de Apoio à Sociedade Civil (GASC), atu bele kontinua no finaliza konstrusaun mesquita refere.
Iha nia diskursu, Coordenador GASC hateten katak komunidade hotu presiza hato’o apresiasaun ba Maun Boot Kay Rala Xanana Gusmão no IX Governu RDTL, ne’ebé kontinua implementa polítika apoiu ba konfisaun relijioza sira.
“Liu husi Gabinete de Apoio à Sociedade Civil, Governu kontinua fó apoiu no kontribuisaun ba komunidade relijiozu sira, inklui atu finaliza obra Mesquita Al-Fatah ne’e,” dehan Coordenador GASC.
Iha oportunidade ne’ebé hanesan, Coordenador GASC husu ba komunidade musulmana iha Afabubo atu kontinua hamoris no uza mesquita ne’e, no asegura manutensaun diak ba oin, atu nune’e infraestrutura ne’e bele funsiona no fó benefísiu ba komunidade iha tempu naruk.
“Governu nafatin konsidera imi-nia ezisténsia no kontribuisaun iha sosiedade, nune’e ita hotu bele moris hamutuk iha espíritu fraternidade umana,” hateten Coordenador GASC.
Serimónia inaugurasaun ne’e hetan partisipasaun hosi Prezidente Kuradór Fundasaun An-Nur, Prezidente Fundasaun An-Nur, Autoridade Seguransa, Autoridade Lokál, no Komunidade Musulmana Suku Afabubo.