Viqueque, 06 Novembru 2026 – Tékniku Espesializadu Konfisaun Relijioza / CET no Infraestrutura, Sr. Horácio G. da Costa, reprezenta Koordenadór Gabinete de Apoio à Sociedade Civil (GASC) partisipa iha serimónia Inaugurasaun Kapela Nossa Senhora de Graça Reino Ossurua – Estasaun Ue-Uelaue iha Suku Ossurua, Postu Administrativu Ossu, Munisípiu Viqueque.
Serimónia inaugurasaun ne’e hahú ho bensaun no talik fita husi Amo Bispo Dioseze Baucau.
Iha nia intervensaun, Komisaun Organizadora hato’o agradese wa’in ba parte hotu ne’ebé fó apoiu hodi finaliza obra refere.
Nune’e mós Amo Pároku Ossu hato’o agradese ba sarani sira hotu nia kontribuisaun ho laran-luak hodi harii uma orasaun ne’e. “Ita la sura se mak apoiu boot liu no ki’ik liu, maibé ho imi hotu nia domin mak ita harii uma orasaun ida ne’e hodi hetan fatin ida dignu atu kontinua selebra misa iha fatin ne’ebé apropriadu.”
Reprezenta Koordenadór GASC, Sr. Horácio G. da Costa iha nia intervensaun hatete:“Kapela ne’ebé ohin hetan ona bensaun no inaugura husi Amo Bispo ne’e hanesan susesu ida ba sarani sira iha Ossurua. Ho imi nia dedikasaun no kontribuisaun tomak, ohin ita konsege ofisialmente inaugura ona. Governu nia parte fó apoiu de’it finanseiru hodi kmaan ba sarani sira atu finaliza, no ho ida ne’e husu nafatin atu kuidadu fasilidade ne’ebé imi hetan ona. Kapela ida ne’e, imi mak sai na’in hodi hametin fiar tuir relijiaun katólika nian.”
Entretantu, Amo Bispo Dioseze Baucau, Dom Leandro Maria Alves, iha nia omilia hatete: “Ho imi nia kontribuisaun no dedikasaun imi harii ona uma orasaun ida ne’e. Maibé ida ne’e de’it sei la to’o se bainhira Domingu imi la mai misa iha fatin ne’e. Ho domin ida ne’e, kontinua hametin iha suku laran, iha komunidade nia laran hodi kria pás no unidade iha uma-laran, suku-laran inklui iha munisípiu no nasaun hodi kontribui ba dezenvolvimentu nasionál liuhosi pás no unidade.”Konstrusaun kapela refere hetan kontribuisaun husi sarani sira Suku Ossurua nian, Dioseze Baucau, Governu liuhosi GASC no entidade sira seluk.Hafoin serimónia inaugurasaun, kontinua kedas ho selebrasaun Misa Eukaristia no fó Sakramentu Krisma ba krisma-na’in hamutuk 307 pessoas.
Marka prezensa iha inaugurasaun ne’e mak: Amo Bispo Dioseze Baucau, Padre Pároku Ossu, Padre Pároku Uatolari, Padre Pároku Lacluta, Reprezenta Koordenadór GASC, Reprezenta Prezidente Autoridade Munisípiu Viqueque, Reprezenta Majór Jenerál F-FDTL, Reprezenta Komandante PNTL Munisípiu Viqueque no sarani sira hotu iha Suku Ossurua.




