Coordenador GASC Ofisialmente Inaugura Kapela Uai-Haco, Venilale

Venilale, 11 Novembru 2026 – Coordenador Gabinete de Apoio à Sociedade Civil (GASC), Eng. Joaquim da Costa Freitas, ofisialmente inaugura Kapela Uai-Haco ne’ebé pertense ba Paróquia Sagrado Coração de Jesus Venilale, Munisípiu Baucau.

Kapela ne’e konstrui husi inisiativa no esforsu sarani lokál iha área ne’e, ho apoiu husi GASC atu kontinua no finaliza konstrusaun ne’ebé sarani lokál sira hahú ona.

Iha nia diskursu, Coordenador GASC hato’o sentimentu haksolok tanba ohin loron sarani sira bele realiza serimónia inaugurasaun ne’e, nu’udar rezultadu husi servisu maka’as, dedikasaun no inisiativa sarani sira nian.

“GASC atribui apoiu ida ne’e ba sarani iha Venilale tanba sira mak inisia no mai husu apoiu wainhira sira la iha ona forsa atu kontinua no finaliza obra ne’e.

Ohin loron ami mai inaugura no entrega obra ida ne’e ba imi, husu ba imi atu tau matan no halo manutensaun ba oin, nune’e edifísiu igreja ida ne’e bele kontinua funsiona no utiliza ba tempu naruk”, dehan Coordenador GASC.

Nia mós afirma katak, prosesu apoiu no implementasaun obra hirak ne’e hala’o ho koordenasaun no kolaborasaun ne’ebé di’ak ho Diocese Baucau.

Serimónia inaugurasaun ne’e konta ho partisipasaun husi Bispo Diocese de Baucau, Dom Leandro Maria Alves, Padre Pároco Venilale, reprezentante Prezidente Autoridade Munisípiu Baucau, Autoridade Postu Administrativu (APA) Venilale, Autoridade Lokál, Autoridade Seguransa, Kleru, Relijiozu/a no sarani sira.

Inaugurasaun Kapela Uai-Haco sai nu’udar rezultadu ida tan husi servisu kolaborasaun entre komunidade sarani lokál, GASC no Diocese Baucau hodi hametin moris espirituál no unidade komunidade nian.

Scroll to Top