Liquica 15 Novembru 2025: Koordenadór Gabinete Apoiu Sosiedade Sivíl (GASC sigla portugés) sábadu semana ne’e inaugura bee moos iha suku Vatuvou munisípiu Liquica ne’ebé maka implementa husi parseiru CVTL.
Enkuantu iha inaugurasaun ne’e xefe suku Vatuvou hateten, nia parte agradese ba GASC ne’ebé maka apoiu ona orsamentu ba iha CVTL hodi dada bee moos ba komunidade aldeia 2 ho uma kain 97 hodi asesu ona ba bee moos, tanba antes ne’e komunidade lao ho distánsia dook maka foin kuru bee.
Iha fatin hanesan Prezidente Autoridade Munisípiu Liquica Paulino Ribeiro hateten katak, nia parte agradese ba GASC ne’ebé maka finansia ona orsamentu mai iha Cruz Vermelha Timor-Leste hodi dada bee moos ba komunidade, tanba bee moos ne’e fatór importante tebes.
Maske nune’e Prezidente CVTL Madalena Hanjam aumetan bee moos agora iha ona komunidade sira tenke kuda modo, hakiak animál hodi Hadia vida ekonomia família nia, no dudu oan sira ba eskola.
Iha fatin hanesan Koordenadór Gabinete Apoiu Sosiedade Sivíl(GASC sigla portugés) Eng. Joaquim da Costa Freitas afirma, gabinete ida ne’e parseria ho CVTL la’ós foin maka la’o maibé la’o tinan naruk ona.
“ ami mós kontente halo alokasaun osan oituan ba sira, maibé halo buat boot, kuandu kompañia maka kaer dala ruma la hotu sira halai hela, maibe CVTL nia halo obra ne’e to’o hotu”. Tenik koordenadór GASC.
Rekoorda mós katak, komunidade iha suku Vatuvou aldeia Gariana no Lebucaileti hamutuk uma kain 97 ho nia abitante 491 maka asesu ona ba bee moos ne’e ho di’ak. . 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
