Dili 13 Agostu 2025 : Movimentu Feto Foin-Sa’e Timor-Leste (sigla MOFFE-TL) kuarta feira semana ne’e hala’o sensibilizasaun kona ba saúde reprodutiva no sexual e prevensaun ba violénsia bazeia ba jéneru ba estudante Feto sira iha eskola Sekundária Jerál Hera no eskola Bázika Central Hera.
Enkuantu objetivu husi sensibilizasaun ne’e maka atu oferese no informa ba labarik feto sira ne’ebé iha idade produtiva no sexual, oinsá prevene no hasees an husi moras sexual no isin rua sedu.
Liu husi introdusaun badak Diretóra Interinu MOFFE Denise Tereza hateten katak, sensibilizasaun ida ne’e importante tebes oinsá atu bele fahe informasaun ba foin-sa’e sira, tanba agora tama ona iha idade reprodutiva tenke hatene an nune’e bele hasees an husi moras sexual sira hodi prevene isin rua sedu.
“ami hanesan organizasaun foin-sa’e ne’ebé maka servisu atu haforsa no suporta feto foin-sa’e no labarik iha Timor-Leste no atividade ne’ebé maka dala barak MOFFE hala’o maka formasaun, sensibilizasaun ba feto foin-sa’e sira, agora daudauk MOFFE servisu hamutuk ho GASC hodi apoiu finanseiru ba atividade sira ne’e.” tenik Denise
Iha fatin hanesan Reprezentante GASC Nori Maria Soares hateten katak, GASC servisu hamutuk ho MOFFE oinsá maka fó formasaun no sensibilizasaun ba feto foin-sa’e sira, tanba ne’e formasaun ida ne’e importante tebes ba estudante sira ne’ebé maka partisipa nune’e bele tranzmite fali informasaun ne’ebé hetan ona ba nia maluk sira seluk.
“dala barak ema ko’alia kona ba violénsia bazeia ba jéneru no violénsia sexual alin feto sira rona de’it, tanba ne’e orsida ekipa MOFFE nia sei fahe informasaun ba alin sira bele komprende, ba alin sira ne’ebé maka la komprende bele husu ba ekipa MOFFE atu fahe informasaun.”dehan Nori
Iha fatin hanesan Diretór Eskola Sekundária Jerál Hera Bernado Alegria hateten, nia parte apresia tebes ba atividade sensibilizasaun ida ne’e oinsá maka estudante sira bele mós iha informasaun kona ba saúde reprodutiva no sexual é prevensaun ba violénsia bazeia ba jéneru no agradese ba GASC ne’ebé maka apoiu ona MOFFE mai hala’o atividade ne’e ba estudante sira. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
