Organizasaun Mane ho Vizaun Foun fó Formasaun Prevensaun Violénsia Bazeia ba Jéneru.

Bibileo 25 agostu 2025: sesta feira semana kotuk 22/08/2025 organizasaun Mane ho Vizaun Foun hala’o sosializasaun ba komunidade iha suku Bibileo Postu Administrativu Viqueque Munisípiu Viqueque.
Tuir Diretór Organizasaun Mane Ho Vizaun Foun hateten katak, violénsia bazeia ba jéneru la’ós akontese de’it ba feto maibé mós ba mane, tanba ne’e organizasaun mane ho vizaun foun hala’o atividade foka liu ba iha prevensaun oinsá ko’alia liu ba violénsia bazeia ba jéneru.
“tanba dala barak ema hanoin dehan violénsia bazeia ba jéneru halai liu ba feto no labarik, maibé lae, tanba ko’alia kona ba asuntu ne’e hare ba feto ho mane tanba ne’e maka organizasaun ida ne’e halo intervensaun no hatán ba governu nia programa liu liu planu Nasionál Bazeia ba Jéneru.” Tenik diretór Mane ho Vizaun Foun.
Iha fatin hanesan Reprezentante Xefe Suku Bibileo Postu Administrativu Viqueque Vila Munisípiu Viqueque hateten katak, lori komunidade nia naran agradese ba organizasaun mane ho Visaun Foun ne’ebé maka presiza tebes informasaun sira oinsá maka bele motiva komunidade sira oinsá maka bele redús númeru violénsia bazeia ba jéneru.
Adjunta Koordenadóra Gabinete Apoiu Sosiedade Sivíl(GASC sigla portugés) Yasinta Lujinha C.das Regras liu husi abertura ba formasaun ne’e hateten katak, asuntu violénsia bazeia ba jéneru sai hanesan isu importante ba iha prosesu konstrusaun estadu ida ne’e, tanba tuir númeru ne’ebé maka to’o agora ema hotu preokupa tebes.
“dala ruma ita dehan lei ne’e iha maibé violénsia kontinua aumenta maibé iha parte ida ita kontente tanba ema barak komesa iha ona informasaun, sira konsidera katak ita labele tolera ita labele nonook bainhira iha violénsia ita presiza ko’alia sai, no hato’o keixa no buka dalan atu tulun ita.” Dehan adjunta koordenadóra GASC
Adjunta Koordenadóra Gabinete Apoiu Sosiedade Sivíl (GASC sigla portugés) Yasinta Lujinha C.das Regras hateten organizasaun sira ne’ebé maka servisu ho komunidade hodi hatutan informasaun sira ne’ebé komunidade seidauk hetan ne’e importante tebes.
Rekorda katak atividade ne’ebé maka organizasaun mane ho vizaun foun hala’o ne’e hetan apoiu fundus mai husi gabinete apoiu sosiedade sivíl. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂