Laklubar 27 juñu 2025: kuarta feira semana ne’e 25/06/2025 ekipa GASC lideradu husi xefe Departamentu Promasaun Empoderamentu Komunitáriu GASC, partisipa atividade abertura ba treinamentu instalasaun bee moos iha Munisípiu Manatuto Postu Administrativu Laclubar, Suku Orlalan, Aladeia Ai-Maulin.
Aleinde iha atividade ne’e hetan partisipa husi reprezentante Autoridade Postu Administrativu Laclubar, ekipa SMASA Munisípiu Manatuto, reprezenta autoridade suku Orlalan, xefe aldeias no komunidades.
Enkuantu liu husi intervensaun Reprezentante Koordenadór GASC, Xefe Departamentu Promosaun Empoderamentu Komunitariu GASC Rogerio Soares hateten, nia husu ba komunidade benefisiáriu sira atu fó kontribuisaun másimu ba atividade instalasaun bee moos, tanba orsamentu ne’ebé apoiu husi GASC nia natureza diferente ho PNDS ho projetu seluk.
“osan sira apoiu ba materiál konstrusaun no instalasaun kanu, osan selu traballadór laiha, iha prosesu hahú husi inísiu konstrusaun no kanalizasaun ne’e ita boot sira mak servisu hamutuk ho ekipa Ong Tuna Mutin.” Tenik Rogerio
Iha fatin hanesan xefe suku orlalan apelu ba komunidade iha suku Orlalan aldeia Ai-Maulin atu kria grupu hodi partisipa ativu iha prosesu konstrusaun no kanalizasaun bee moos to’o remata, servisu ho voluntariu.
“tanba bee ne’e ita boot sira mak sei benefísiu direta no projetu refere la iha fundus ba traballadór ka la selu.”dehan Autoridade lokál.
Reprezentante Autoridade Postu Administrativu Laclubar, hateten nia parte parabeniza ba komunidade Ai-Maulin tanba bele hetan oportunidade no hetan apoiu husi GASC liu husi Ngo Tuna Mutin, hein katak komunidade sei servisu hamutuk ho ONG no sei hatudu rezultadu di’ak no komunidade sira sei la kuru bee ho distánsia dook
Diretór Tuna Mutin, husu ba benefisiáriu sira atu partisipa iha treinamentu kona-ba instalasaun bee moos no jestaun fasilidade, atu nune’e bainhira projetu ne’e remata bele jere ho kuidadu. 𝐑𝐄𝐌𝐀𝐓𝐀.
𝗜𝗻𝗳𝗼𝗿𝗺𝗮𝘀𝗮𝘂𝗻 𝐨𝐟𝐢𝐬𝐢𝐚́𝐥 𝙼𝗲́𝗱𝗶𝗮 𝐆𝐀𝐒𝐂
