Dili 25 Novenbru 2025: tersa feira semana ne’e Adjunta Koordenadóra Gabinete Apoiu Sosiedade Sivíl(GASC sigla portugés) Yasinta Lujina C. das Regras sai oradór ba Forum Nasionál ne’ebé maka organiza husi ONG Ba Futuru ho nia tópiku maka “Oinsá Asesu No Hetan Fundus Husi Gabinete Apoiu Sosiedade Sivíl.
Enkuantu iha forum nasionál ne’ebé maka partisipa husi ONG sira, Adjunta Koordenadóra Gabinete Apoiu Sosiedade Sivíl(GASC sigla portugés) Yasinta Lujina C. das Regras hateten katak, Gabinete Sosiedade Sivíl estabelese husi atuál Primeiru Ministru iha tinan 2007 ho hanoin ida katak, iha prosesu governasaun dala ruma governu rasik labele halo buat hotu hodi kobre fatin hotu serví komunidade, tanba ne’e maka sosiedade sivíl maka sai hanesan parseiru governu nia.
“papél sosiedade sivíl nia dala ruma ema nia interpretasaun oin oin, maibé ita bazeia ba lei númeru 5/2005, ne’ebé define katak se maka sosiedade sivíl, hanesan asosiasaun, fundasaun, no organizasaun sira ne’ebé maka prienxe rekezitus tuir lei nu.5 ida ne’e maka sai hanesan gia ba gabinete ida ne’e hodi define oinsá nia parseria hamutuk ho sosiedade sivíl”. Tenik Adjunta Koordenadóra GASC.
Aleinde ne’e Adjuntu Koordenadóra Gabinete Apoiu Sosiedade Sivíl (GASC sigla portugés) Yasinta Lujina C. das Regras aumenta katak rekezitus dahuluk atu hetan fundus husi GASC maka tenke rejistu iha Ministériu Justisa, legalmente hanesan fundasaun, asosiasaun, dala ruma organizasaun veteranu tanba ne’e maka tenke iha registu legalmente husi Ministériu Justisa.
Enkuantu atividade Furum Nasionál ne’ebé maka hala’o iha salaun enkontru Sentru Treinamentu Vokasionál Juventude Comoro ne’e sei hala’o durante loron 25 to’o 26 novembru 2025 ne’ebé maka oradór sira mai husi GASC, MAPPF, MJDAC SEFOPE. 𝐑𝐄𝐌𝐀𝐓𝐀.
𝐈𝐧𝐟𝐨𝐫𝐦𝐚𝐬𝐚𝐮𝐧 𝐎𝐟𝐢𝐬𝐢𝐚́𝐥 𝐍𝐨 𝐀𝐭𝐮𝐚́𝐥 𝐇𝐮𝐬𝐢 𝐌𝐞́𝐝𝐢𝐚 𝐆𝐀𝐒𝐂
